وفاقی حکومت کا پنشن بل 609 ارب روپے تک پہنچ گیا

وفاقی حکومت کا پینشن بل 609 ارب روپے تک پہنچ گیا ہے جبکہ گھوسٹ پنشنرزکا مسئلہ حل نہ ہوسکا۔

سینیٹ کی قائمہ کمیٹی برائے خزانہ کے اجلاس میں وزارت خزانہ کے حکام نے بتایا کہ وفاقی حکومت کا پنشن بل 609 ارب روپے تک پہنچ چکا ہے ،جبکہ گھوسٹ پنشنرزکا مسئلہ تاحال حل نہیں ہو سکا ہے۔

وزارت خزانہ کے حکام نے بریفنگ میں بتایا کہ 9لاکھ 49 ہزارپنشنرزکو تاحال مینوئل طریقے سے پینشن کی ادائیگی جاری ہے ، جن میں6 ہزار 600 سو سے زائد گھوسٹ پنشنرزبھی شامل ہیں۔

حکام کے مطابق 32 لاکھ 38 ہزارپنشنرزمیں سے 22 لاکھ 90 ہزار ڈائریکٹ کریڈٹ اسکیم پرمنتقل ہوچکے ہیں اورسول پنشنرز90 فیصد، ملٹری پنشنرز41 فیصد براہ راست بینک اکاؤنٹ میں پینشن لیتےہیں۔

پنجاب، سندھ اورخیبرپختونخوا میں 100 فیصد پنشنرزکو بینک اکاؤنٹ میں ادائیگیاں کی جارہی ہیں، بلوچستان میں 93 فیصد پنشنرزکو ڈی سی ایس اسکیم پرمنتقل کردیاگیا۔

وزرات خزانہ کے حکام کے مطابق پینشن کی ادائیگی 100 فیصد ڈی سی ایس سسٹم پرمنتقلی کیلئےایک سال درکار ہے۔