فری ہینڈ ملے تو اگلے دو سال کیلئے ماہانہ ایک ارب ڈالر دے سکتے ہیں، ملک بوستان

پاکستان فاریکس ایکسچینج ایسوسی ایشن کے چیئرمین ملک بوستان نے کہا ہے کہ ملک میں اس وقت لوگوں کے پاس 4 ارب ڈالر گھر میں پڑے ہیں، فری ہینڈ دیا جائے ہم حکومت کو اگلے دو سال کے لیے ماہانہ ایک ارب ڈالر دے سکتے ہیں۔

سینیٹ کی قائمہ کمیٹی برائے خزانہ کو بریفنگ کے دوران پاکستان فاریکس ایکسچینج ایسوسی ایشن کے چیئر مین نے کہا کہ شیطان کی آنت کی طرح عالمی مالیاتی ادارے (آئی ایم ایف) کے مطالبات بڑھتے جا رہے ہیں، 30 سال میں پاکستان سے 180 ارب ڈالر بیرون ملک جاچکے ہیں، ملک میں فارن ایکسچینج کی کمی نہیں ہے تاہم مارکیٹ کبھی ڈنڈے سے قابو نہیں آتی اس کے لیے ہمیں فری ہینڈ دینے کی ضرورت ہے۔

اپنی بات کو جاری رکھتے ہوئے انہوں نے کہا کہ کرپٹو کرنسی اور فارن فاریکس ٹریڈ میں پیسا ضائع ہو رہا ہے، 15 ہزار ڈالر تک صارفین سے شناختی کارڈ نہ مانگنے کی اجازت دی جائے، اب تو ڈالر کے لیے بھی بائیو میٹرک کروانی پڑتی ہے جبکہ حوالہ اور ہنڈی والے گھر تک سپلائی دیتے ہیں۔

ملک بوستان کا مزید کہنا تھا کہ ملک میں ایٹمی دھماکوں کے بعد 10 ارب ڈالر لے کر دیے، اس وقت حکومت کو 40 کروڑ ڈالر ماہانہ دے رہے ہیں، 4 ارب ڈالر سالانہ عوام کو سفر کے ساتھ ساتھ تعلیمی اخراجات میں دیتے ہیں، اس وقت حکومت کو 4 ارب ڈالر فراہم کیے ہیں، فنانشل ایکشن ٹاسک فورس (ایف اے ٹی ایف) قانون کے تحت 15 ہزار ڈالر تک فروخت کرنے پر شناخت کی ضرورت نہیں ہے۔

انہوں نے کہا کہ افغان ٹرانزٹ ٹریڈ میں بہت اضافہ ہوا ہے، تجارت میں حوالہ استعمال ہو رہا ہے، پہلے روزانہ ایک کروڑ ڈالر بینکوں میں جمع کرواتے تھے اب بہت کم جمع ہو رہا ہے، افغانستان سے تجارت کو ملکی کرنسی میں کیا جائے، آئی ٹی کے فری لانسر اربوں ڈالر لا سکتے ہیں۔

چیئر مین فارن ایکسچینج نے مزید کہا کہ برطانیہ اور دبئی نے حوالہ بینکنگ کے لیے لائسنس جاری کیے ہیں، مرکزی بینک نے ایکسچینج کمپنیوں کے چارجز کو محدود کردیا ہے، بینکوں کو ایک ڈالر لانے پر 20 روپے جبکہ ہمیں ایک روپیہ ملتا ہے، پاکستان میں اس وقت لوگوں کے پاس 4 ارب ڈالر گھر میں پڑے ہیں، اس رقم کو حاصل کرنے کے لیے حکومت شناخت کی پابندی اٹھا لے، شناخت صرف دس ہزار ڈالر سے اوپر خریدوفروخت کرنے والوں سے کی جائے۔