عدلیہ میں عمران خان کے سہولت کاروں کو بےنقاب کریں گے، مریم نواز

پاکستان مسلم لیگ ن کی چیف آرگنائزرمریم نواز نے کہا ہے کہ عمران خان اوراس کے سہولت کاروں کے بارے میں تمام حقائق عوام کے سامنے لانے کی حکمت عملی تیار کر لی ہے۔

مسلم لیگ (ن) کی نائب صدرمریم نوازکی زیرصدارت پارٹی ترجمانوں کا اجلاس ہوا ، جس میں اہم فیصلے کیے گئے ہیں۔

اجلاس میں نوازشریف کیخلاف غیر منصفانہ اورانتقامی فیصلے اورگواہیاں عوام کے سامنے لانے،اورعمران خان اوراس کے سہولت کاروں کی کرپشن اور لوٹ مار کے حقائق سامنے لانے کے فیصلے کیے گئے ہیں۔

ن لیگ کے اجلاس میں اتفاق کیا گیا کہ عوام کو بتایاجائے گا کہ گزشتہ چار سال میں ملک کیسے تباہ ہوا، اوران کرداروں اوران کے کرتوت سامنے لائے جائیں گے۔

چیف آرگنائزر مریم نواز نے اجلاس سے خطاب کرتے ہوئے کہا عمران خان ماضی بن چکا ہے، اب پاکستان کے مستقبل کےلئے سوچنا ہے،گزشتہ چار سال میں معیشت تباہ، عوام غریب ہوئے۔

انہوں نے کہا جسٹس منصورعلی شاہ اور جسٹس مندوخیل کا فیصلہ ہمارے بیانیے کی جیت ہے،بنچ سازی منصفانہ نہیں تو فیصلہ کیسے منصفانہ متصور ہوگا؟

انکا کہنا تھا عمران خان اپنے کرپشن مقدمات سے عوام کی توجہ ہٹانا چاہتا ہے، عمران خان کے خلاف ٹیرین، فارن فنڈنگ، توشہ خانہ مقدمات میں ناقابل تردید ثبوت موجود ہیں۔

مریم نواز نے کہاعدلیہ میں عمران خان کے سہولت کاروں کو پوری قوت سے بے نقاب کریں،نوازشریف کے مقدمے میں آئین اور قانون کی پامالی کو بے نقاب کیا جائے گا،نواز شریف کے ساتھ زیادتی کی جتنی شہادتیں آ رہی ہیں ابھی تک ترازو کے پلڑے برابر ہو جانے چاہئیں تھے۔

انہوں نے کہاچار سال میں ایک کروڑ نوکری میں سے ایک نوکری اور 50 لاکھ گھروں میں سے ایک گھرعوام کو نہیں دیا،10نمبریوں کا صرف ایک نکاتی ایجنڈا ہے کہ لوٹ مار کریں،10نکاتی ایجنڈا نہیں 10 جھوٹ بولے ہیں۔

ان کا کہنا تھا یہ جھوٹ کا ایجنڈا ہے جسے نئے نام سے پھر دوہرایا جا رہا ہے،90دن میں کرپشن ختم کرنے کے بجائے پاکستان میں کرپشن 14 درجے مزید بڑھ گئی تھی۔

ایک ٹویٹ میں مریم نوازنے مزید کہا کہ جس جس نے بھی عمران کی سہولت کاری کی، بدنامی و رسوائی اس کا مقدر بنی۔

انہوں نے کہاعمران ایک فارن ایجنٹ ہے جس کی ذمہ داری پاکستان میں فتنہ و انتشارپیدا کرنا ہے تاکہ یہ ملک آگے نا بڑھ پائے اورہروہ ہاتھ جواس شیطانی کھیل کو مضبوط کرنے کے لیے اٹھتا ہے، اسی کھیل کا حصہ تصور کیا جائے گا۔