آصف زرداری پر سنگین الزام: شیخ رشید کو عدالت سے عارضی ریلیف مل گیا

آصف زرداری پر عمران خان کے قتل کی سازش کے الزام کے کیس میں شیخ رشید احمد ڈسٹرکٹ اینڈ سیشن کورٹ اسلام آباد میں پیش ہوگئے۔ عدالت کو بتایا کہ مقدمہ ختم کرنے کے حوالے سے درخواست دائر کر رکھی ہے، عدالت نے شیخ رشید کو حاضری لگا کر جانے کی اجازت دے دی۔

ڈسٹرکٹ اینڈ سیشن کورٹ اسلام آباد میں آصف زرداری پر عمران خان کے قتل کی سازش کے الزام کے کیس کی سماعت ہوئی، سابق وفاقی وزیر شیخ رشید احمد جوڈیشل مجسٹریٹ عباس شاہ کی عدالت میں پیش ہوگئے۔

ڈسٹرکٹ جج نے استفسار کیا کہ کیا مقدمے کا چالان آگیا ہے۔ سرکاری وکیل نے بتایا کہ مقدمے کا چالان آچکا ہے۔

شیخ رشید نے عدالت کو آگاہ کیا کہ میرے وکیل آج سپریم کورٹ میں ہیں اس لئے آج پیش نہیں ہوسکے، مقدمہ ختم کرنے کے حوالے سے درخواست بھی دائر کر رکھی ہے۔

عدالت نے سابق وفاقی وزیر شیخ رشید احمد کو عارضی ریلیف دیتے ہوئے حاضری لگا کر واپس جانے کی اجازت دے دی۔

ڈسٹرکٹ اینڈ سیشن کورٹ نےشیخ رشید احمد کو مقدمے میں آج فرد جرم عائد کرنے کیلئے طلب کر رکھا تھا، گزشتہ سماعت پر طبیعت ناسازی کے باعث شیخ رشید پیش نہیں ہوئے تھے۔

سابق صدر آصف زرداری پر عمران خان کے قتل کی سازش کے الزام پر تھانہ سیکریٹریٹ نے شیخ رشید کیخلاف ایف آئی آر درج کر رکھی ہے۔