ملک میں غیر آئینی انتخابات ہونے جارہے ہیں، رانا ثناء اللہ

پاکستان مسلم لیگ ن پنجاب کے صدر اور وفاقی وزیر داخلہ رانا ثناء اللہ نے بڑا اعلان کرتے ہوئے کہا ہے کہ ملک میں غیر آئینی انتخابات ہونے جارہے ہیں کیونکہ نگراں سیٹ اپ صوبائی اور قومی اسمبلی کے انتخابات کروانے کا پابند ہے، پنجاب اور خیبرپختونخوا کے انتخابی نتائج کو کوئی تسلیم نہیں کرے گا، خواہش ہے ملک میں ایک ساتھ انتخابات ہوں۔

فیصل آباد میں پریس کانفرنس کرتے ہوئے وفاقی وزیر داخلہ نے کہا کہ تحریک انصاف کے چیئر مین اور سابق وزیراعظم عمران خان نے مسلح جتھوں کے ساتھ مل کر اسلام آباد میں گزشتہ روز جوڈیشل کمپلیکس پر حملہ کیا جتھوں کیساتھ عدالت جانا غنڈہ گردی ہے کیونکہ اگر یہی روایت برقرار رہی تو آئندہ کوئی بھی شخص مسلح جتھوں کے ساتھ عدالت جاکر دباؤ ڈالے گا اور قانون کو روند دے گا۔

اپنی بات کو جاری رکھتے ہوئے انہوں نے کہا کہ عمران خان کو عدالت کے باہر ہی حاضری لگوانی تھی تو یہ کام لاہور کے کینال روڈ یا ٹول پلازہ پر بھی کیا جا سکتا تھا۔

وزیر داخلہ نے مزید کہا کہ عمران خان مسلسل جھوٹ بول کرقوم کو گمراہ کرنے کی کوشش کر رہے ہیں، عمران خان نے سیاست میں گالم گلوچ کے کلچر کو پروان چڑھایا اور سیاسی مخالفین پرالزام تراشی کے سوا کچھ نہیں کیا۔ لیگی چیف آرگنائزر نے مریم نواز نے عمران خان کی فتنہ فساد کی نام نہاد سیاست کو بے نقاب کیا اور بے نقاب کرتی رہیں گی۔

رانا ثناء اللہ کا کہنا تھا کہ عمران خان کے بیانات اس کےدل میں بغض کا نتیجہ ہیں، اب بتائیں کہ 50 ارب کا خزانے کو ٹیکا لگایا وہ پیسے کدھر ہیں، فرنٹ پرسن فرح گوگی کا بتاؤ کہ وہ کہاں ہے۔

وزیر داخلہ نے کہا کہ ’اس شخص کولوٹ مار کا حساب دینا ہوگا، آج نہیں تو کل اسے تمام چیزوں اور قومی خزانے کو نقصان پہنچانے کا حساب دینا ہوگا۔ پولیس نے رہائشی حصے کی تلاشی نہیں لی جبکہ وارنٹ تھے، اگر پولیس وہاں جاتی تو بہت زیادہ ممنوعہ اشیا مل سکتی تھیں۔

ان کا کہنا تھا کہ ملک میں غیر آئینی انتخابات ہونے جارہے ہیں کیونکہ نگراں سیٹ اپ صوبائی اور قومی اسمبلی کے انتخابات کروانے کا پابند ہے، پنجاب اور خیبرپختونخوا کے انتخابی نتائج کو کوئی تسلیم نہیں کرے گا اور پھر اس سے ملک میں غیر یقینی صورت حال بڑھے گی جو آپ کی خواہش ہے، ہماری خواہش ہے کہ پورے ملک میں ایک ساتھ انتخابات ہوں مگر جب بھی الیکشن ہوئے تو قوم آپ کو ووٹ کی طاقت سے ہی مسترد کرے گی۔