زمان پارک میں پولیس وین پر حملہ، ملزمان کیخلاف سخت کارروائی کا فیصلہ

زمان پارک میں پاکستان تحریک انصاف کے کارکنوں کی جانب سے پولیس وین پر حملے کے معاملے پر حکومت پنجاب نے ملزمان کے خلاف سخت کارروائی کا فیصلہ کرلیا۔

لاہور میں پی ٹی آئی چیئرمین انصاف عمران خان کی رہائش گاہ زمان پارک میں پولیس کی جانب سے آپریشن کے بعد پی ٹی آئی کارکنوں نے ایک بار پھر شدید مزاحمت کی، اےایس آئی علی فرقان سمیت 4 اہلکار زخمی ہوگئے، پولیس نے لاٹھی چارج کیا اور 60 سے زائد پی ٹی آئی کارکنوں کو گرفتار کرلیا۔

زمان پارک میں پی ٹی آئی کارکنان نے پولیس وین پر بھی حملہ کیا، ترجمان پنجاب حکومت کے مطابق حملہ آوروں کیخلاف سخت کارروائی کا فیصلہ کیا گیا ہے۔

تازہ اطلاعات کے مطابق زمان پارک کا کنٹرول ایک بار پھر پی ٹی آئی کارکنوں نے سنبھال لیا۔

ترجمان کا کہنا ہے کہ شرپسندوں کیخلاف سخت کارروائی کی جائے گی۔

دوسری جانب لاہور پولیس نے زمان پارک سے گرفتار 3 طالب علموں کو ورثاء کے حوالے کردیا۔

پولیس نے کم عمری کے باعث طلبہ کیخلاف کارروائی سے گریز کیا اور بچوں کو والدین کا سہارا بننے کی نصیحت کرتے ہوئے چھوڑ دیا۔

والدین نے بچوں کے مستقبل کو محفوظ بنانے کیلئے لاہور پولیس کے اقدام کو سراہا۔