شاہین شاہ آفریدی قلندرز کے بولر حارث رؤف کی حمایت میں بول پڑے

شاہین شاہ آفریدی لاہور قلندرز کے بولر حارث رؤف کی حمایت میں بول پڑے۔ کہتے ہیں کہ حارث دنیا کا بہترین بولر ہے، ایک اوور میں 22 رنز دینے کے باوجود بھی مجھے اس پر اندھا اعتماد ہے۔

پی ایس ایل 8 فائنل میں لاہور قلندرز کے حارث رؤف نے 19ویں اوور میں 22 رنز دیئے تھے، جس کے باعث ان کی ٹیم دباؤ میں آگئی تھی، تاہم محمد زمان نے آخری اوور میں شاندار بولنگ کی اور شاہین الیون نے ایک رن سے کامیابی حاصل کرکے پاکستان سپر لیگ کا ٹائٹل مسلسل دوسری بار اپنے نام کیا۔

لاہور میں میچ کے بعد پریس کانفرنس کرتے ہوئے قلندرز کے کپتان شاہین شاہ آفریدی نے کہا کہ عاقب جاوید اور ثمین رانا کا ٹیم کو بنانے میں اہم کردار ہے، مجھے اعتماد دیا گیا میں اس وقت کپتان بنا جب مجھ سے سینئر محمد حفیظ جیسے کھلاڑی ٹیم میں موجود تھے۔

ایک سوال کے جواب میں ان کا کہنا ہے کہ مجھے لگا تھا کہ اگر میں اوپر بیٹنگ کروں تو کچھ کرسکتا ہوں، میں نے ایک پیڈ پہنا ہوا تھا پورا تیار بھی نہیں تھا لیکن خود آنے کا فیصلہ کیا، میں سمجھتا تھا کہ ایک دو اچھے شاٹ لگ گئے تو ہم دباؤ سے نکل آئیں گے۔

شاہین شاہ آفریدی نے ملتان سلطانز کیخلاف پی ایس ایل فائنل میں 15 گیندوں پر 5 چھکوں اور 2 چوکوں کی مدد سے 44 رنز کی جارحانہ اننگز کھیلی تھی جبکہ 51 رنز دے کر 4 وکٹیں بھی حاصل کیں، ان شاندار آل راؤنڈ کارکردگی پر میچ کا بہترین کھلاڑی قرار دیا گیا تھا۔

حارث رؤف کے ایک اوور میں 22 رنز دینے سے متعل سوال پر لاہور قلندرز کے کپتان نے کہا کہ حارث رؤف دنیا کا بہترین بولر ہے، مجھے اس پر اندھا اعتماد رہتا ہے، ایک اوور میں 22 رنز دینے کے باوجود وہ اچھا بولر ہے، آخری اوور میں اچھی بولنگ کا کریڈٹ محمد زمان کو جاتا ہے۔

ان کا کہنا ہے کہ پی ایس ایل دنیا کی بہترین لیگز میں سے ایک ہے، یہاں بہت اچھے میچز ہوئے، میری ٹیم ڈیمانڈ کرتی ہے کہ جلد وکٹ لے کر دوں، میں چاہے لیگ کھیلوں یا ملک کیلئے جلد وکٹ لینے کی کوشش کرتا ہوں تاکہ دوسری ٹیم کو دباؤ میں لاسکوں۔

شاہین شاہ آفریدی نے قومی ٹیم کے وکٹ کیپر اور ملتان سلطانز کے کپتان محمد رضوان کو جنتی قرار دیتے ہوئے کہا کہ وہ ایک الگ اور خاص انسان ہے۔