کیا دنیا سے کرونا وائرس کا خاتمہ ہوگیا؟

ورلڈ ہیلتھ آرگنائزیشن نے اعلان کیا ہے کہ اس سال کوویڈ 19 کا خطرہ اس حد تک کم ہوسکتا ہے کہ یہ موسمی انفلوئنزا کے خطرے کی طرح ہوجائے۔

غیر ملکی میڈیا کے مطابق ڈبلیو ایچ او کے ایمرجنسی ڈائریکٹر مائیکل ریان نے جمعہ کو ایک پریس کانفرنس کے دوران بتایا کہ مجھے لگتا ہے کہ ہم اس مقام پر پہنچ رہے ہیں جہاں ہم ’’ کوویڈ 19’’ کو موسمی فلو کی مانند دیکھ سکیں گے۔

ان کا کہنا ہے کہ کرونا صحت کے خطرے اور زندگیاں نگلنے والے وائرس کے طور پر نہیں بلکہ زندگی میں خلل نہ ڈالنے والے ایک وائرس کے طور پر معاشرے میں باقی رہے گا، مجھے لگتا ہے یہ اس سال ہی ہوگا۔

مائیکل ریان نے مزید کہا کہ دنیا اب وبائی امراض کے دوران پہلے سے کہیں بہتر جگہ پر ہے، مجھے یقین ہے کہ اس سال ہم یہ کہہ سکیں گے کہ ’‘ کوویڈ 19’’ بین الاقوامی تشویش پر مبنی پبلک ہیلتھ ایمرجنسی کے طور پر ختم ہوگیا ہے۔

ورلڈ ہیلتھ آرگنائزیشن نے 30 جنوری 2020ء کو طبی ایمرجنسی کا اعلان کیا تھا جب چین سے باہر وائرس کے 100 سے کم کیسز اور صفر اموات ریکارڈ کی گئی تھیں۔