پاکستانی شہری کی قتل کیس میں سعودی عرب حوالگی کی منظوری

وفاقی کابینہ نے سعودی عرب کو مطلوب ملزم وسیم اسلم کی حوالگی کی منظوری دے دی، کپاس کی امدادی قیمت 8500 ہزار روپے فی من مقرر کرنے کا بھی فیصلہ ہوگیا۔

وزیراعظم شہباز شریف کی زیر صدارت وفاقی کابینہ کا اجلاس ہوا، جس میں کئی اہم فیصلے کئے گئے۔

وزیراعظم شہباز شریف نے کہا ہے کہ حکومت نے وکلا تحفظ بل 2023ء پارلیمنٹ میں پیش کرنے اور کپاس کی فصل کو کاشتکاروں کیلئے منافع بخش بنانے کی غرض سے 8500 روپے فی من کی امدادی قیمت کی منظوری دے دی۔

وفاقی کابینہ نے وزارتِ خزانہ کی سفارش پر سیکیورٹی اینڈ ایکسچینج کمیشن آف پاکستان کے مختلف ممالک اور بین الاقوامی اداروں کے ساتھ 15 باہمی اور 2 کثیر طرفہ مفاہمتی یادداشتوں کی ایکس پوسٹ فیکٹو کی منظوری دی۔

وفاقی کابینہ نے اسٹیٹ بینک کی سفارش پر ایس ایم ای بینک کے وائنڈنگ ڈاؤن کی منظوری دے دی۔ کابینہ نے ہدایت کی کہ وائنڈنگ ڈاؤن کے دوران بینک کے تمام صارفین کے ڈیپازٹس کی حفاظت یقینی بنائی جائے، پہلے مرحلے میں بینک کے تمام صارفین کو 5.557 ارب روپے کی ادائیگیاں کی جائیں گی۔

وفاقی کابینہ نے وزارتِ داخلہ کی سفارش پر سعودی حکومت کی جانب سے محمد وسیم اسلم ولد محمد اسلم کی سعودی عرب حوالگی کیلئے ایڈیشنل ڈپٹی کمشنر کی سربراہی میں ایکسٹراڈیشن ایکٹ 1972ء کے تحت انکوائری کمیٹی تشکیل دینے کی منظوری دے دی، حکومت پاکستان کا سعودی حکومت کے ساتھ مجرمان کی حوالگی کے حوالے سے معاہدہ موجود ہے، محمد وسیم اسلم سعودی حکومت کو قتل کے کیس میں مطلوب ہے۔

وفاقی کابینہ نے وزارتِ مذہبی امور اور بین المذاہب ہم آہنگی کی سفارش پر پاکستان سکھ گردوارہ پربندھک کمیٹی (پی ایس جی پی سی) کی تشکیل نو کی منظوری بھی دے دی۔ مذکورہ 13 رکنی کمیٹی میں تمام صوبوں سے سکھ برادری کی نمائندگی کو یقینی بنایا گیا ہے، یہ کمیٹی آئندہ 3 سال کیلئے گردواروں کی دیکھ بھال، سکھ یاتریوں کی خدمت اور دیگر انتظامی امور سنبھالے گی۔

وفاقی کابینہ نے کابینہ کمیٹی برائے لیجسلیٹو کیسز کے 13 مارچ 2023ء کے اجلاس میں کئے گئے فیصلے کی بھی توثیق کردی، جبکہ اقتصادی رابطہ کمیٹی کے 14 مارچ 2023 اور 15 مارچ 2023ء کو منعقدہ اجلاسوں کے فیصلوں کی بھی توثیق کردی گئی۔