زمان پارک کو نو گو ایریا بنانیکی کوشش کی گئی، آئی جی پنجاب
انسپکٹر (آئی جی) پنجاب ڈاکٹر عثمان انور نے کہا ہے کہ زمان پارک میں مسلح جتھوں نے پولیس ، رینجرز پر حملہ کیا، زمان پارک کو نو گو ایریا بنانے کی کوشش کی گئی۔
لاہور میں نگران صوبائی وزیر عامر میر کے ہمراہ میڈیا سے گفتگو کرتے ہوئے انہوں نے کہا کہ ظل شاہ کی ہلاکت کے ذمے دار دونوں افراد نے مجسٹریٹ کے سامنے اعتراف جرم کرلیا، دونوں ملزمان نے سوا، سوا گھنٹے کا اعترافی بیان دیا۔ جج صاحب نے لکھا ہے انہوں نے اعترافی بیان سے متعلق مکمل تسلّی کرلی ہے۔
اپنی بات کو جاری رکھتے ہوئے آئی جی نے کہا کہ ایک مظلوم شخص کا بیٹا حادثے میں جاں بحق ہوتا ہے، وہ بھی پولیس پر ڈال دیا جاتا ہے، گاڑی کے ڈرائیور اور ساتھی کا 164 کا بیان ہوچکا ہے، انہوں نے مجسٹریٹ کے سامنے اعترافی بیان دیا ہے۔
زمان پارک آپریشن روکنے کے حکم میں توسیع، پی ٹی آئی کو جلسہ نہ کرنے کی ہدایت
انہوں نے کہا کہ مسلح جتھوں نے زمان پارک میں پولیس پر حملہ کیا، ڈنڈے برسائے، رینجرز کی گاڑی پر حملہ کیا گیا، خاتون ایس پی پر پتھراؤ کیا گیا، زمان پارک کو نو گو ایریا بنانے کی کوشش کی گئی۔ گولی چلانا بہت آسان ہوتا ہے، بہادری یہ ہے گولی نہ چلائی جائے، زمان پارک جانے والی پولیس ٹیم کے پاس کوئی اسلحہ نہیں تھا، اعلیٰ پولیس افسر بھی غیر مسلح تھے۔
ڈاکٹر عثمان انور کا مزید کہنا تھا کہ ہنگامہ آرائی پر مقدمات درج کرلیے گئے، جس کے بعد گرفتاریاں جاری ہیں، کوئی فورس آپس میں نہیں لڑی، جس نے وردی پہنی ہے وہ ریاست کا ملازم ہے۔
اس موقع پر بات کرتے ہوئے صوبائی وزیر اطلاعات عامر میر نے کہا ہے کہ زمان پارک میں تحریک نفاذ شریعت محمدی کے سربراہ مولانا صوفی محمد کا قریبی ساتھی موجود ہے، یہ دہشتگرد 8 سال کی سزا کاٹ چکا ہے۔ عسکریت پسند اب پختونخوا کی سیاسی جماعت کے ساتھ ہے اور سابق وزیراعلی خیبر پختونخواہ نے اپنے ساتھ رکھا ہوا ہے۔ ہماری فورس جب بھی زمان پارک کی طرف گئی ان کے پاس ڈنڈوں کے سوا کوئی اسلحہ نہیں تھا، گورنمنٹ نے فیصلہ کیا ہوا ہے کہ جانی نقصان نہ ہو۔ جب زمان پارک آپریشن مکمل ہوگا تو ساری تفصیلات سامنے لائیں گے۔
اپنی بات کو جاری رکھتے ہوئے عامر میر نے کہا کہ پنجاب پولیس تحمل سے کام لے رہی ہے لیکن دوسری جانب سے تشدد کے واقعات ہوئے ہیں جس میں درجنوں پولیس جوان زخمی ہوئے، کچھ شدید زخمی ہیں۔ عمران خان کے وارنٹ پر عمل کا فیصلہ کیا تو گرفتاری میں زیادہ وقت نہیں لگے گا۔
