پاکستان کو ملنے والی امداد کا فائدہ مخصوص طبقات کے بجائے عوام کو ہونا چاہیے، امریکا

امریکی وزارت خارجہ کے ترجمان نیڈ پرائس نے کہا ہے کہ پاکستان کو ملنے والی امداد کا فائدہ مخصوص طبقات کے بجائے عوام کو ملنا چاہیے۔

واشنگٹن میں پریس بریفنگ کرتے ہوئے نیڈ پرائس نے کہا کہ ہم پاکستان میں جمہوریت اور اس کے آئینی نظام کی حمایت کرتے ہیں لیکن سیاسی حوالے سے فیصلے پاکستان کے عوام کو خود کرنا ہیں۔

امریکا کی پاکستان میں سب کو تحمل کی ترغیب

نیڈ پرائس نے کہا کہ پم پاکستان کو ایک پرامن، مستحکم اور خوشحال ملک دیکھنا ہے، لیکن پاکستان کو کئی برسوں سے معاشی مشکلات کا سامنا ہے۔ پاکستانی عوام ریکارڈ مہنگائی کا سامنا کررہے ہیں۔ ہم چاہتے ہیں کہ پاکستانی عوام ملک کو ایک پائیدار اقتصادی راہ اور خوشحالی کے دیرپا راستے پر گامزن کریں۔

امریکی وزارت خارجہ کے ترجمان کا کہنا تھا کہ ہم پاکستان کی آئی ایم ایف کے ساتھ معاملات جاری رکھنے کی حمایت کرتے ہیں، پاکستانی حکومت معاشی اصلاحاتی ایجنڈے پر کام کررہی ہے، ہم پاکستان کے کاروباری ماحول کو بہتر بنانے کے لیے کی جانے ولای اصلاحات کی حمایت کرتے ہیں، کیونکہ اس سے پاکستان میں کاروبار کرنا دنیا کے لیے مزید پرکشش اور مسابقتی ہو جائے گا۔

امریکا میں پاکستانی نژاد پولیس اہلکار قتل

ترجمان امریکی وزارت خارجہ نے کہا کہ پاکستان زبردست صلاحیتوں کا حامل ملک ہے، ہم نے پاکستان کے شراکت داری ہیں۔ ہم اس بات کو یقینی بنانا چاہتے ہیں کہ پاکستان کے اپنے وسائل اور امریکا سمیت دیگر عالمی برادری و بین الاقوامی مالیاتی اداروں کے فراہم کردہ وسائل کو ذمہ داری سے استعمال کیا جائے۔ بین الاقوامی مالی امداد پاکستان کی ترقی پر خرچ ہونی چاہیے، اس امداد کا فائدہ مخصوص طبقات کے بجائے عوام کو ملنا چاہیے۔

پاک بھارت تعلقات کے حوالے سے نیڈ پرائس نے کہا کہ ہم پاکستان اور بھارت کے درمیان دیرینہ تنازعات کے حل کے لیے سفارتکاری کی حمایت کرتے ہیں۔ ہم دونوں ممالک کے درمیان مذاکرات کی ہر طرح سے حمایت کرنے کے لیے تیار ہیں لیکن یہ فیصلہ انہیں خود کرنا ہوگا۔

ترجمان امریکی محکمہ خارجہ نے کہا کہ ملکوں کے درمیان باہمی مذاکرات کا فیصلہ ان کا اپنا ہوتا ہے، اگر وہ اس عمل میں امریکا کا کردار سمجھتے ہیں تو ہم پاکستان اور بھارت کے شراکت دار کی حیثیت سے ہر طرح کی حمایت کے لیے تیار ہیں۔ امریکا ہمیشہ پاکستان اور بھارت کے درمیان ہمیشہ بامعنی سفارت کاری کے ذریعے تعمیری بات چیت کی حمایت کرتا ہے۔