پشاور زلمی کے مینٹور انضمام الحق کا پی ایس ایل انتظامیہ کو انوکھا مشورہ

کوئٹہ کے خلاف تاریخی شکست کے بعد پشاورزلمی کے مینٹور انضمام الحق نے ایک بار پھر باؤنڈری لائن بڑھانے کا مطالبہ کردیا۔

پاکستان سپر لیگ (پی ایس ایل) سیزن 8 کے 25 ویں میچ میں پشاور زلمی کی جانب سے کوئٹہ گلیڈی ایٹرز کو241 رنز کا ہدف دیا گیا تھا جو کہ پی ایس ایل کا اب تک کا سب سے بڑا ہدف تھا۔

کوئٹہ گلیڈی ایٹرز نے پشاور زلمی کی جانب سے دیا گیا 241 رنز کا ہدف 19 ویں اوور میں 2 وکٹوں کے نقصان پر پورا کرکے پاکستان سپر لیگ میں نئی تاریخ رقم کردی۔

کوئٹہ کے خلاف تاریخی شکست کے بعد پشاورزلمی کے مینٹور انضمام الحق نے باؤنڈری لائن بڑھانے کا مطالبہ کرتے ہوئے کہا کہ اب تو اسپنرز کو راتوں کو نیند بھی نہیں آرہی، باؤنڈری لائن کو 70 کے بجائے 75 میٹر کردینا چاہئے۔

یاد رہے کہ اس سے قبل بھی انضمام الحق باؤنڈری لائن کو بڑھانے کا مطالبہ کرچکے ہیں۔