ٹی 20 کرکٹ میں کم سکور کا نیا ریکارڈ، 10 رنز پر پوری ٹیم آؤٹ

ٹی ٹوینٹی کرکٹ کی تاریخ میں کم ترین سکور کا نیا ریکارڈ قائم ہو گیا ہے۔

اتوار کے دن ٹی ٹوئنٹی کی ایک نئی تاریخ اس وقت رقم ہوئی جب آئیل آف مین کی پوری ٹیم اسپین کے خلاف صرف 10 رن بنا کر آؤٹ ہو گئی۔ یہ میچ اسپین میں کھیلا جانے والا ایک باقاعدہ بین الاقوامی ٹی ٹوئنٹی میچ تھا۔

اس تاریخی میچ میں آئیل آف مین کی جانب سے جوزف بروز ٹاپ سکورر رہے جنھوں نے پولین لوٹنے سے قبل چار رن بنائے جو مجموعی سکور کا 40 فیصد تھا۔ ان کی ٹیم کے سات کھلاڑی صفر پر آوٹ ہوئے۔

تبریز شمسی نے وکٹ لینے کے بعد جوتا کیوں دکھایا؟

دوسری جانب سپین کی جانب سے لیفٹ آرم فاسٹ بالر عاطف محمود اور محمد کامران نے چار چار وکٹیں حاصل کیں۔

اس میچ کی دلچسپ بات یہ بھی تھی کہ آئیل آف مین کی ٹیم کو 10 رن پر آوٹ کرنے کے بعد جب سپین کے اوپنر میدان میں آئے تو ان کے پاس پورے 20 اوور تھے لیکن انھوں نے صرف دو گیندیں ہی کھیل کر آئیل آف مین کو ہرا دیا۔

اوپنر اویس احمد نے یکے بعد دیگرے پہلے اوور کی دو گیندوں پر چھکے لگا کر اپنی ٹیم کو فتح سے ہمکنار کروایا۔

خیال رہے کہ آئیل آف مین برطانیہ اور آئر لینڈ کے درمیان واقع ایک چھوٹا سا جزیرہ ہے جس کی کرکٹ ٹیم 2017 میں انٹرنیشنل کرکٹ کونسل کے ساتھ بطور ایسوسی ایٹ رکن رجسٹر ہوئی۔

لاہور قلندرز نے نئی تاریخ رقم کردی

واضح رہے کہ اس سے قبل ٹی ٹوئنٹی کا سب سے کم سکور آسٹریلیا کی بگ بیش لیگ میں بنا تھا جب سڈنی تھنڈر کی ٹیم گذشتہ سال ایڈلیڈ سٹرائِیکر کے خلاف صرف 15 رن کا مجموعہ بنا سکی تھی۔

دوسری جانب کسی بین الاقوامی ٹی ٹوئنٹی میچ میں سب سے کم سکور کا اعزاز ترکی کے نام تھا جس کی کرکٹ ٹیم 2019 میں چیک ریپبلک کے خلاف 21 رن بنا کر آوٹ ہو گئی تھی۔