چوہدری پرویز الٰہی اپنے 10 ساتھیوں سمیت پی ٹی آئی میں شامل

چوہدری پرویز الٰہی نے اپنے 10 سابق اراکین پنجاب اسمبلی سمیت پاکستان تحریک انصاف میں شمولیت اختیار کرلی۔ فواد چوہدری کا کہنا ہے کہ ق لیگ کے اراکین آج سے پی ٹی آئی کا حصہ ہوں گے، پرویز الٰہی کو پارٹی صدر بنایا جارہا ہے۔

مسلم لیگ ق سے نکالے گئے چوہدری پرویز الٰہی اپنے 10 ساتھیوں سمیت پاکستان تحریک انصاف میں شامل ہوگئے۔ انہوں نے فواد چوہدری کے ہمراہ پریس کانفرنس میں پی ٹی آئی جوائن کرنے کا اعلان کیا۔

چوہدری پرویز الٰہی نے اپنے تمام سابق ایم پی ایز سمیت عمران خان اور پی ٹی آئی قیادت سے ملاقات کی، اس موقع پر مونس الٰہی، حسین الٰہی بھی موجود تھے، اس دوران اتحاد اور الحاق سے متعلق طویل بحث ہوئی، جس کے بعد پرویز الٰہی نے پی ٹی آئی میں شمولیت کا فیصلہ کیا۔

میڈیا سے گفتگو کرتے ہوئے سابق وفاقی وزیر فواد چوہدری کا کہنا تھا کہ پرویزالہٰی مسلم لیگ ق چھوڑ کر پی ٹی آئی جوائن کررہے ہیں، پرویز الہٰی اور ان کے ساتھی آج سے پی ٹی آئی کا حصہ ہوں گے، پرویزالہٰی عمران خان کی قیادت میں نئے پاکستان کیلئے جدوجہد کریں گے، ان کے موجودہ بحران میں کردار کو سراہتے ہیں۔

انہوں نے مزید کہا کہ چوہدری پرویز الٰہی کو پی ٹی آئی کا مرکزی صدر بنایا جارہا ہے، یہ بات مرکزی قیادت نے کی ہے، جس پر جلد ہی عملدرآمد ہوجائے گا۔

صحافیوں سے گفتگو میں سابق وزیراعلیٰ پنجاب پرویز الٰہی نے کہا کہ ہر مشکل گھڑی میں عمران خان کا ساتھ دیا، ہمارے ایم پی ایز او خواتین پر مختلف تھانوں میں مقدمے ہوئے اس کے باوجود عمران خان کے ساتھ کھڑے رہے، عمران خان اور پی ٹی آئی کی لیڈر شپ کا احترام کرتے ہیں، ہمیشہ عمران خان کا ساتھ دیں گے۔

مزید جانیے: چوہدری پرویز الٰہی کو ق لیگ سے نکال دیا گیا

ان کا کہنا ہے کہ ہر وہ کام کریں گے جس سے پاکستان کا، ملک کا اور عوام کا فائدہ ہوگا، ایسا کام نہیں کریں گے جس سے ہماری جماعت پی ٹی آئی کو نقصان پہنچے، ہم نے اسپتالوں اور دیگر شعبوں میں کام کئے، شہباز شریف نے آکر انہیں بند کردیا، شہباز شریف نے ساری زندگی ایسا کوئی کام نہیں کیا جس سے عام آدمی کی بھلائی ہو۔

واضح رہے کہ چوہدری شجاعت حسین نے مسلم لیگ ق کے قائد کی حیثیت سے چوہدری پرویز الٰہی کو نوٹسز جاری کئے گئے جس پر جواب نہ ملنے پر آج ان کی پارٹی رکنیت اور تمام عہدے ختم کردیئے گئے تھے۔