کوئٹہ گلیڈی ایٹرز نے کراچی کنگز کو 6 رنز سے شکست دیدی

پی ایس ایل 8 کے میچ میں کوئٹہ گلیڈی ایٹرز نے کراچی کنگز کو سنسنی خیز مقابلے کے بعد 6 رنز سے شکست دیدی، شعیب ملک کی نصف سنچری رائیگاں گئیں۔

پاکستان سپر لیگ سیزن 8 کا چھٹا میچ کراچی کے نیشنل بینک کرکٹ ارینا میں کھیلا گیا، جس میں کراچی کنگز نے کوئٹہ گلیڈی ایٹرز کیخلاف ٹاس جیت کر فیلڈنگ کا فیصلہ کیا۔

کوئٹہ گلیڈی ایٹرز نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 168 رنز بنائے۔

کراچی کنگز 169 رنز کے ہدف کے تعاقب میں مقررہ 20 اوورز میں 5 وکٹوں کے نقصان پر 162 رنز تک محدود رہی اور کوئٹہ گلیڈی ایٹرز نے میچ 6 رنز سے جیت لیا۔

کراچی کنگز کا آغاز بھی اچھا نہیں رہا اور 35 رنز پر ان کے 3 کھلاڑی پویلین لوٹ گئے، شرجیل خان اور حیدر علی بغیر کوئی رن بنائے پویلین لوٹ گئے جبکہ جیمز ونس نے 22 رنز بنائے۔

میتھیو ویڈ 15 اور کپتان عماد وسیم 5 رنز بنائے، اس کے بعد شعیب ملک اور عرفان خان نیازی نے کریز سنبھالی دونوں نے ٹیم کو 86 رنز کی شراکت فراہم کی تاہم آخری اوور میں درکار 24 رنز نہ بناسکے۔

تجربہ کار بلے باز شعیب ملک 49 گیندوں پر 71 اور نوجوان بیٹر عرفان خان نیازی 26 گیندوں پر 37 رنز بنا کر ناقابل شکست رہے۔

کوئٹہ گلیڈی ایٹرز کی جانب سے محمد حسنین نے صرف 29 رنز دے کر 2 کھلاڑیوں کو آؤٹ کیا، نسیم شاہ، محمد نواز اور محمد قیس نے ایک ایک شکار کیا۔

اس سے قبل کوئٹہ گلیڈی ایٹرز کو پہلے بیٹنگ دینے کا کراچی کنگز کے کپتان عماد وسیم کا فیصلہ درست ثابت ہوا جب انہوں نے پہلے ہی اوور میں بغیر کوئی رن دیئے 2 کھلاڑیوں کو آؤٹ کردیا، کوئٹہ گلیڈی ایٹرز کے صرف 13 رنز پر تین کھلاڑی پویلین لوٹ چکے تھے، جن میں جیسن رائے اور عبدالواحد بنگلزئی صفر، صفر جبکہ عمر اکمل 4 رنز بناسکے۔

کپتان سرفراز احمد، مارٹن گپٹل کا ساتھ دینے کریز پر آئے تو ایسا لگا شاید وہ ٹیم کو سنبھال دے دیں گے تاہم وہ بھی 5 رنز بنا کر چلتے بنے۔

کپتان کے بعد افتخار احمد نے مارٹن گپٹل کو جوان کیا، دونوں نے مل کر ذمہ داری سے بیٹنگ کرتے ہوئے ٹیم کا مجموعہ 92 رنز تک پہنچایا تاہم افتخار احمد 32 رنز بنا کر محمد عامر کی گیند پر عمران طاہر کو کیچ تھما بیٹھے، محمد نواز بھی 3 رنز بنا کر آؤٹ ہوئے۔

کراچی کنگز کے بولرز کے سامنے مارٹن گپٹل آخری وقت تک ڈٹے رہے، انہوں نے 44 گیندوں پر اپنی نصف سنچری مکمل کی اور مزید 18گیندیں کھیل کر اسے سنچری میں تبدیل کردیا۔

کیوی بلے باز مارٹن گپٹل نے 19ویں اوور میں اینڈریو ٹائے کو 4 چوکوں اور 3 چھکے لگا کر 30 رنز بٹور لئے۔ انہوں نے 67 گیندوں پر 12 چوکوں اور 4 بلند و بالا چھکوں کی مدد سے 117 رنز بنائے، وہ اننگز کی آخری گیند پر چھکا لگانے کی کوشش میں کیچ آؤٹ ہوئے۔

کراچی کنگز کی جانب سے عماد وسیم نے 4 اوورز میں 16 رنز دے کر 3، عامر یامین نے 37 رنز کے بدلے 3 جبکہ محمد عامر نے 4 اوورز میں 23 رنز دیکر ایک کھلاڑی کو آؤٹ کیا۔

کوئٹہ گلیڈی ایٹرز کیلئے کھیلنے والے کیوی بیٹر مارٹن گپٹل کو شاندار سنچری پر میچ کا بہترین کھلاڑی قرار دیا گیا۔

کوئٹہ گلیڈی ایٹرز کی ٹیم میں سرفراز احمد (کپتان)، جیسن رائے، مارٹن گپٹل، عبدالواحد بنگلزئی، عمر اکمل، افتخار احمد، محمد نواز، اوڈین اسمتھ، محمد حسنین، نسیم شاہ اور قیس احمد شامل ہیں۔

نیشنل بینک کرکٹ ارینا نے کراچی کنگز اور کوئٹہ گلیڈی ایٹرز کی ٹیموں نے بھرپور پریکٹس کی اور دونوں ٹیمیں پہلی جیت کیلئے پرعزم ہیں۔

کراچی کنگز نے ٹیم میں دو تبدیلیاں کی ہیں، محمد موسیٰ اور جیمز فلر کی جگہ عامر یامین اور عمران طاہر کو شامل کیا گیا ہے، عماد وسیم (کپتان)، شرجیل خان، حیدر علی، محمد عامر، شعیب ملک، جیمز ونس، میتھیو ویڈ، اینڈریو ٹائے اور محمد عرفان خان بھی ٹیم کا حصہ ہیں۔

کراچی کنگز اب تک دو میچز کھیل چکی ہے جس میں اسے شکست کا سامنا کرنا پڑا ہے جبکہ کوئٹہ گلیڈی ایٹرز بھی ایک میچ کھیلی ہے تاہم اسے کامیابی نصیب نہیں ہوئی۔