پنجاب سے کالعدم تنظیموں کے 9 دہشت گرد گرفتار

محکمہ انسداد دہشت گردی پنجاب نے کامیاب آپریشنز کے دوران صوبہ پنجاب سے کالعدم تنظیموں کے 9 دہشت گردوں کو گرفتار کرلیا۔

پنجاب میں کاؤنٹر ٹیرر ازم ڈیپارٹمنٹ کی جانب سے آج بروز ہفتہ 11 فروری کو جاری بیان کے مطابق قانون نافذ کرنے والے اداروں نے پنجاب کے مختلف اضلاع میں انٹیلی جنس آپریشن کرتے ہوئے دہشت گردوں کو گرفتار کیا۔

ترجمان سی ٹی ڈی پنجاب کے مطابق گرفتار دہشتگردوں میں عفان، کاشف، جواد سعید، ثاقب الیاس، سبز علی، داؤد شاہ اور احمد جان شامل ہیں، دہشتگردوں کے خلاف 10 مقدمات درج ہیں جن کی تفتیش جاری ہے۔

ترجمان سی ٹی ڈی کا کہنا ہےکہ کارروائی کے دوران خودکش جیکٹ، دھماکا خیز مواد، دستی بم، ڈیٹونیٹر، اسلحہ، ریموٹ کنٹرول ڈیوائسز اور حساس مواد پر مشتمل کتابیں برآمد کرلی گئیں۔

ترجمان کے مطابق دہشت گردوں کا تعلق کالعدم ٹی ٹی پی اور داعش کے مختلف گروپوں سے ہے، دہشتگردوں کی شناخت 26 مشتبہ افراد سے تفتیش کے دوران ہوئی۔

ترجمان سی ٹی ڈی کا کہنا ہےکہ رواں ہفتے 564 کومبنگ آپریشنز میں 93 مشتبہ افراد کو گرفتار کیا گیا۔