يوم يکجہتی کشمير آج ملی جوش و جذبے سے منایا جا رہا ہے

پاکستان ( Pakistan ) بھر میں کشمریوں ( Kashmir Day ) سے یکجہتی کا اظہار کرتے ہوئے یوم یکجہتی کشمیر آج بروز اتوار مورخہ 5 فروری کو منایا جا رہا ہے۔ اس دن کی مناسبت سے وزیراعظم کا کہنا ہے کہ بھارتی جبر سے آزادی تک کشمیریوں کی حمایت جاری رکھیں گے، جب کہ صدر پاکستان ڈاکٹر عارف علوی نے اپنے پیغام میں کہا کہ بھارت کا ظالمانہ رويہ جبری گمشدگيوں اور پيلٹ گن کے استعمال سے ظاہر ہوتا ہے۔

مظلوموں کی آواز ميں آواز ملانے کا دن، یوم یکجہتی کشمیر آض منایا جا رہا ہے۔ تینتیس برس قبل پانچ فروری کو جو سلسلہ شروع ہوا، وہ آج بھی جاری ہے اور آزادی ملنے تک نہيں رکے گا۔ کشمیر اور پاکستان، دو قالب، یک جان ہیں، کئی دہائیوں سے بھارتی مظالم کا سامنے کرتے نہتے کشمیریوں کے شانہ بشانہ کھڑے ہیں۔ آج یوم یکجہتی کشمیر کے موقع پر صبح 10بجے سائرن بجا کر ایک منٹ کی خاموشی اختیار کی گئی۔

آج آزاد کشمیر کی قانون ساز اسمبلی کا خصوصی اجلاس بھی طلب کیا گیا، جس میں وزیراعظم شہباز شریف کشمیر اسمبلی سے خطاب کریں گے۔ ملک بھر میں یوم یکجہتی کشمیر کی مناسبت سے تقاریب اور سیمینار ہوں گے جن میں قابض فورسز کی بربریت کیخلاف آواز اٹھائی جائے گی۔

علاوہ ازیں اسلام آباد میں کُل جماعتی حریت کانفرنس اور دیگر جماعتیں اقوام متحدہ کے دفتر میں یو این او کی قراردادوں کے تحت کشمیر میں استصواب رائے کرانے کے مطالبے پر مشتمل یادداشتیں پیش کریں گی۔

مظفرآباد میں کوہالہ پل پر سائرن بجا کر 2 منٹ تک خاموشی اختیار کی گئی، جب کہ انسانی ہاتھوں کی زنجیر بنا کر کشمیریوں سے یکجہتی کا اظہار بھی کیا گیا۔

وزیراعظم کا پیغام

یوم یکجہتی کشمیر کے موقع پر وزیراعظم پاکستان میاں محمد شہباز شریف کا اپنے پیغام میں کہنا ہے کہ بھارتی جبر سے آزادی تک کشمیریوں کی حمایت جاری رکھیں گے، پانچ اگست دو ہزار انیس کے اقدامات کے بعد کشمیر کی صورت حال گھمبیر ہوئی ہے۔

انہوں نے کہا کہ بھارتی یکطرفہ اقدامات کو پاکستان اور کشمیریوں نے مسترد کردیا ہے، بھارت وادی میں آبادی کا تناسب تبدیل کرنے کی مذموم کوششوں میں مصروف ہے۔ بھارت سمجھتا ہے کہ کشمیری عوام کے آہنی ارادے کو کچل سکتا ہے تو وہ غلطی پر ہے۔ بھارتی افواج کی ریاستی دہشت گردی، کشمیریوں کے عزم کو کمزور نہیں کرسکتی۔ پاکستان بین الاقوامی فورمز پر بھارت کے وحشیانہ اقدامات کو بےنقاب کرتا رہے گا۔

صدر مملکت کا پیغام

یوم کشمیر پر صدر مملکت ڈاکٹر عارف علوی نے کہا کہ کشميريوں کے حق خوداردايت کيلئے پاکستان کی غير متزلزل حمايت کا اعادہ کرتے ہيں، کشميری عوام کی سلامتی کونسل کی قراردادوں کے مطابق حق خوداراديت دينا ہوگا۔

صدر عارف علوی نے یہ بھی کہا کہ بھارت مقبوضہ کشمير ميں ماورائے عدالت قتل اور تشدد ميں ملوث ہے۔ بھارت کا ظالمانہ رويہ جبری گمشدگيوں اور پيلٹ گن کے استعمال سے ظاہر ہوتا ہے۔

آئی ایس پی آر

عسکری ترجمان کی جانب سے یوم کشمیر پر کشمیروں کو بھرپور خراج تحسین پیش کیا گیا ہے۔ چيئرمين جوائنٹ چيفس آف اسٹاف، مسلح افواج کے سربراہان نے خصوصی پيغام میں کہا ہے کہ کشميريوں کے آزادی کے عزم کو دبايا نہيں جاسکتا، کشميريوں کو اقوام متحدہ کی قراردادوں کے مطابق حق خوداراديت ملنا چاہيے۔