تنخواہوں کی عدم ادائیگی، بحرین میں پاکستانی سفارتخانے کے ملازم نے استعفیٰ دیدیا

بحرین میں قائم پاکستانی سفارتخانے میں پاسپورٹ ملازم کے طور پر کام کرنے والے محمد حسین نے ایک سال سے تنخواہ نہ ملنے پر استعفیٰ دیدیا۔

کئی ماہ سے تنخواہوں سے محروم اوورسیز پاسپورٹ عملہ انتہائی قدم اٹھانے پر مجبور ہوگیا، بحرین میں قائم پاکستانی سفارتخانے کے پاسپورٹ ملازم نے تنخواہ کی عدم فراہمی پر نوکری سے استعفیٰ دے دیا۔

سفارتخانے کو بھیجے گئے استعفیٰ میں ڈی ای او مشین ریڈ ایبل پاسپورٹ محمد حسین نے30 دن کا نوٹس دیتے ہوئے کہا ہے کہ جون 2022ء سے جنوری 2023ء تک تنخواہ نہیں ملی، 8 مہینے کی واجب الادا تنخواہ دی جائے۔

محمد حسین کا مزید کہنا ہے کہ تنخواہ نہ ملنے سے سنگین مالی مشکلات کا شکار ہوں، بھاری دل سے یہ انتہائی قدم اٹھایا ہے۔