وفاقی کابینہ کا اہم اجلاس، سانحہ پشاور پر حکام کی بریفنگ

وفاقی دارالحکومت اسلام آباد میں وزیراعظم پاکستان میاں محمد شہباز شریف کی زیرصدارت وفاقی کابینہ کا اہم اجلاس جاری ہے، جس میں حکام کی جانب سے وزیراعظم کو سانحہ پشاور کی اب تک کی تحقیقات سے آگاہ کیا گیا ہے۔

قبل ازیں اجلاس کا آٹھ نکاتی ایجنڈے جاری کیا گیا، اجلاس وزیراعظم ہاؤس میں دن گیارہ بجے شروع ہوا۔ وزیرداخلہ رانا ثناء اللہ نے ملک کی سیکیورٹی صورت حال، خصوصاً پشاور حملے کی تحقیقات سے متعلق بریفنگ دی۔

اجلاس میں ملک میں امن و امان کی صورت حال پر بھی غور ہوگا، ملک کی مجموعی سیاسی اور معاشی صورت حال کا بھی جائزہ لیا جائے گا۔

اجلاس میں اسلام آباد میں ویسٹ مینجمنٹ پلان منظوری کیلئے پیش کیا جائے گا، جب کہ توانائی بچت پلان پر عمل درآمد اور رکشوں ، موٹر سائیکلوں کیلئے لوگریڈ پیٹرول کی فراہمی سے متعلق پاور ڈویژن کیجانب سے بریفنگ دی جائے گی۔

آج ہونے والے اجلاس میں توشہ خانہ سے متعلق نئے رولز کا جائزہ لیا جائے گا۔ کابینہ میں سرمایہ کاری بورڈ کے ریگولیٹری اصول اور گائیڈ لائنز پیش کی جائیں گی۔

اجلاس میں قانون سازی سے متعلق کابینہ کمیٹی کے ستائیس جنوری کے فیصلوں کی منظوری اور سترہ تا پچیس جنوری کے دوران ای سی سی فیصلوں کی توثیق کی جائے گی۔