عمران خان گراؤنڈ سے باہر ہوکر ذہنی طور پر بیمار ہوچکا ہے، خواجہ آصف
وفاقی وزیر خواجہ آصف کا کہنا ہے کہ عمران خان پویلین میں بیٹھ کر تڑپ رہا ہے اور ذہنی طور پر بیمار ہوچکا ہے۔
سیالکوٹ میں سماء سے خصوصی بات کرتے ہوئے وزیر دفاع خواجہ آصف کا کہنا تھا کہ اس سے بہترکوئی حل نہیں کہ سب مل کرملک کی بقا کیلئے بات کریں، ہمیں عمران خان کی طرح اقتدار کے ساتھ چمٹے رہنے کا لالچ نہیں، اقتدار صدا ایک کے پاس نہیں رہتا۔
وزیر دفاع کا کہنا تھا کہ اگر یہی نظام چلتا رہا توپھر سب کچھ برباد ہوجائے گا، حل یہی ہے سب لوگ بیٹھ کر ایک قومی سطح پر مذاکرات شروع کریں، جس میں کسی ایک فریق کے مفادات کو پروٹیکٹ نہ کیا جائے بلکہ ملک اور عوام کا مفاد دیکھا جائے۔
خواجہ آصف نے کہا کہ شہبازشریف نے 4 سال پہلے کہا تھا کہ میثاق معیثیت کرنا چاہیے، اس میں کوئی اختلاف نہیں ہونا چاہئے، مل بیٹھ کر معاشی مشکلات کا حل کرنا چاہیے، ایک حل الیکشن بھی ہوسکتا ہے مگر واحد حل الیکشن نہیں ہے، میرے خیال میں کوئی نہ کوئی اس سلسلہ میں پیش رفت ہو اور اسکے بعد الیکشن یہ بھی ہوسکتا ہے جن تاریخوں میں الیکشن ہونا ہیں اس سے پہلے پہلے یہ معاملات طے کر لئے جائیں تاکہ الیکشن کا ردوبدل نہ ہو۔
وفاقی وزیر کا کہنا تھا کہ گفتگو شروع ہوجائے تو پھر خود ہی حل نکلنے شروع ہوجائیں گے، اگر پہلے منزل کا تعین کر لیں گے ٹھیک نہیں، اس طرح معاملات حل نہیں ہوں گے، ایک کھلے ذہین کے ساتھ بیٹھنا چاہیے، ہر شخص کو بتا ہے مسائل کیا ہیں، ان کو سامنے رکھ کر حل ڈھونڈا جا سکتا ہے، عام پاکستانی کا جس میں فائدہ ہو وہ حل ڈھونڈا جائے، ہمارے افراد کے مقاصد پہلے نمبر پر، پھر گروہی مقاصد اور پھر ملک اور ملکی عوام کے مقاصد کہی دور نظر آتے ہیں۔ یہ سب الٹا ہونا چاہیے۔
وزیر دفاع کا کہنا تھا کہ عمران خان گراونڈ سے باہر ہو چکے ہیں، اور پویلین میں بیٹھ کر تڑپ رہے ہیں، عمران خان ذہنی طور پر بیمار آدمی ہے، کبھی اسمبلیاں توڑتا ہے کبھی استعفے دیتا ہے، کبھی فوج اورعدلیہ کوگالی دیتا ہے کبھی ان کے ترلے کرتا ہے، اس کا اوّل و آخر ذاتی مفاد ہے، لوگوں کی دولت اور جیب پر نظر سرکاری خزانے پر نظر، پی ٹی آئی والے اس کے دماغ کا علاج کرائیں۔
وفاقی وزیر نے مزید کہا کہ موجودہ وقت میں مریم نواز کی انٹری اہمیت کی حامل ہے، ان کی جدوجہد کو تمام طبقات تسلیم کرتےہیں، ہماری پارٹی اور قومی سیاست کے نقطہ نظر سے مریم کی بہت زیادہ فالونگ ہے، ان کا استقبال بھی ٹھوس شہادت ہے، ان کا نا صرف مسلم لیگ ن بلکہ ملک کے سیاسی مستقبل میں انکا بہت بڑا رول ہے۔
KHAWAJA ASIF
