عمران خان کے بیان سے پیپلز پارٹی کی لیڈر شپ کو جان کا خطرہ ہوسکتا ہے ،خواجہ آصف
وزیر دفاع خواجہ آصف کا کہنا ہے کہ عمران خان کے بیان سے پیپلز پارٹی کی لیڈر شپ کو جان کا خطرہ ہوسکتا ہے۔
سیالکوٹ میں میڈیا سے بات کرتے ہوئے وزیردفاع خواجہ آصف کا کہنا تھا کہ عمران خان نے بہت سے پینترے بدلے ہیں، گزشتہ روز اس نے آصف زرداری پر بڑا الزام لگایا ہے، اور یہ الزام لگا کر نیا پتہ کھیلا ہے، جس کی جتنی مذمت کی جائے کم ہے۔
خواجہ آصف کا کہنا تھا کہ عمران خان نے سیاست کے رخ کو موڑنے کی کوشش کی ہے، ان کے الزامات کی کوئی حقیقت نہیں ہے، لیکن اس بیان سے پی پی کی قیادت کو جان کا خطرہ ہوسکتا ہے، عمران خان نے بہت سے کارڈز کھیلے ہیں، لیکن اس نے اب جو کارڈ کھیلا ہے خدانخواستہ اس سے خدا نخواستہ ملک میں خون خرابہ ہوسکتا ہے، ملک میں کوئی سانحہ ہواتوذمہ دارعمران خان ہوں گے۔
وفاقی وزیر کا کہنا تھا کہ عمران خان کا مقصد ہے سیاست میں خون خرابہ ہو، پیپلزپارٹی نے دہشت گردی کیخلاف جنگ میں بہت قربانیاں دی ہیں، اور ہمیشہ جمہوریت کا راستہ اپنایا ہے۔
خواجہ آصف نے کہا کہ ملک میں معاشی تباہی کے ذمہ دار عمران خان ہیں، بنی گالا سے پارلیمنٹ آنے جانے میں 96 کروڑ روپے خرچ کردیئے گئے، ان کا الزام امریکا سے شروع ہوکر محسن نقوی پر آگیا، پی ٹی آئی کے دور میں سیاسی مخالفین کو جیلوں میں رکھا گیا۔
وفاقی وزیر نے کہا کہ مجھ پر آرٹیکل 6 بغاوت کا مقدمہ بنایا گیا تھا، اور اس مقدمے کی منظوری کابینہ نے دی تھی، سیاسی جماعتوں کو ایک دوسرے کیخلاف جھوٹے مقدمات نہیں کرنے چاہیے، ہماری سیاست میں اس قسم کے واقعات پہلے ہوئے نہ آئندہ ہوں گے۔
وزیردفاع کا کہنا تھا کہ پی ٹی آئی کے اراکین کے استعفے منظور ہو چکے ہیں، اب یہ عدالتوں میں جا رہے ہیں، اس وقت انہوں نے کہا ہم چوروں کے ساتھ نہیں بیٹھنا چاہتے، ہم آوازیں دیتے رہے کہ اسمبلی آجاؤ، اب جب استعفے منظور ہونا شروع ہوئے تو اسمبلی میں واپس آرہے ہیں، قانون کسی سیاسی جماعت کے تابع نہیں ہونا چاہیے۔
خواجہ آصف نے کہا کہ اب فواد چوہدری کے حوالے سے بھی سیاسی کارروائی کا کہا جا رہا ہے، اپنا ماضی سامنے رکھ کر رونا دھونا کریں، اداروں کیخلاف بات کریں گے تو قانون حرکت میں آئے گا۔
وفاقی وزیر کا کہنا تھا کہ عمران خان ایک مایوس انسان ہے، قانون حرکت میں آتا ہے تو کہتے ہیں انتقامی کارروائی ہورہی ہے، کوئی حربہ کام نہیں آیا تو فوج کو آوازیں دے رہے ہیں، عارف علوی سے کہتا ہے کہ میری ملاقاتیں کروائیں، کل انہوں نے سپریم کورٹ اور آرمی چیف کو بھی خط لکھا ہے، جن لوگوں کا آئین پر یقین ہو وہ ادھر ادھر خطوط نہیں لکھتے، قومی معاملات پارلیمنٹ میں طے ہوں گے۔
KHAWAJA ASIF
