گوجرانوالہ: راشن کیلئے خواجہ سراء کو نچانے پر مقدمہ درج

گوجرانوالہ میں راشن کیلئے آنیوالے خواجہ سرا سے رقص کرانے کے معاملے کا مقدمہ درج کرلیا گیا۔ خواجہ سرا کا مؤقف ہے کہ نامعلوم افراد کی جانب سے فون پر دھمکیاں دی جارہی ہیں، تحفظ فراہم کیا جائے۔

چند روز قبل سستا راشن لینے کیلئے ڈپٹی کمشنر کمپلیکس میں آٹا لینے کیلئے آئے خواجہ سراء سے ڈانس کرنے کی شرط رکھی گئی، واقعے کی ویڈیو وائرل ہونے پر انتظامیہ نے ایکشن لیتے ہوئے ذمہ داران افراد کیخلاف کارروائی کا اعلان کیا۔

اسسٹنٹ ڈپٹی کمشنر کا کہنا ہے کہ ویڈیو چند ماہ پرانی معلوم ہوتی ہے تاہم اس طرح کے واقعات کا ہونا کسی صورت برداشت نہیں کیا جائے گا۔

رقص کرانے کے معاملے پر متاثرہ خواجہ سراء کی مدعیت میں گوجرانوالہ کے تھانہ سول لائنز میں مقدمہ درج کرلیا گیا ہے۔

خواجہ سراء کا مؤقف ہے کہ وہ 22 جولائی کو راشن لینے کیلئے ڈی سی کمپلیکس گیا تھا جہاں اسے زبردستی نچایا گیا۔

خواجہ سراء کا مزید کہنا ہے کہ اب نامعلوم افراد کی جانب سے فون پر دھمکیاں دی جارہی ہیں، مجھے تحفظ اور انصاف فراہم کیا جائے۔