تہران میں آذربائیجان کے سفارتخانے پر مسلح شخص کا حملہ، گارڈ جاں بحق

ایران کے دارالحکومت تہران میں آذربائیجان کے سفارتخانے پر مسلح شخص کی فائرنگ سے ایک سیکیورٹی گارڈ جاں بحق اور دو زخمی ہوگئے۔

افسوسناک واقعے کی سی سی ٹی وی فوٹیج میں دیکھا جاسکتا ہے ایک بزرگ شہری دو بچوں کے ساتھ ہاتھ میں بندوق اٹھائے ایمبسی میں داخل ہوتا ہے اور اندھا دھند فائرنگ کرتا ہے۔

آذربائیجان کی وزارت خارجہ کے مطابق حملے میں ایک سیکیورٹی گارڈ ہلاک اور دو زخمی ہوئے ہیں۔

تہران پولیس کا کہنا ہے کہ ممکنہ طور پر اس حملے کی ”ذاتی وجوہات“ ہوسکتی ہیں، مشتبہ شخص کو حراست لے کر تفتیش شروع کردی گئی ہے۔

ایرانی میڈیا کے مطابق مبینہ حملہ آور کی بیوی اپریل میں آذربائیجان کی ایمبیسی میں کسی کام کے سلسلے میں گئی تھی جس کے بعد سے وہ لاپتہ ہے، مسلح شخص اپنی بیوی کی تلاش میں ایمبیسی گیا تھا جس کا یقین ہے کہ اُسے وہاں پر یرغمال بناکر رکھا گیا ہے۔

دوسری جانب آذربائیجان کے وزیراعظم الہام علیوف نے تہران میں اپنے ملک کے سفارتخانے پر حملے کو دہشتگردی کی کارروائی قرار دیتے ہوئے اس کی شفاف تحقیقات کرانے کا مطالبہ کیا ہے۔

ترکی نے بھی تہران میں آذربائیجان کے سفارتخانے پر حملے کی مذمت کرتے ہوئے واقعے میں ملوث ملزمان کو کٹہرے میں لانے کا مطالبہ کیا ہے۔