وزیراعظم کا امریکا سے اقتصادی تعلقات میں بہتری کے عزم کا اعادہ

وزیراعظم شہبازشریف نے کہا ہے کہ پاکستان امریکا کے ساتھ اپنے دیرینہ تعلقات کو اہمیت دیتا ہے، پاکستان اور امریکا کے درمیان اقتصادی اور تجارتی تعلقات کو مزید مستحکم بنانے کیلئے پرعزم ہیں۔

پاکستان میں امریکا کے سفیر ڈونلڈ بلوم سے ملاقات وزیراعظم نے جنیوا میں حال ہی میں منعقد ہونے والی ریزیلیئنٹ پاکستان بین الاقوامی کانفرنس سمیت سیلاب کے بعد پاکستان کی تعمیر نو اور بحالی کی کوششوں کے لئے امریکہ کی مسلسل حمایت پر شکریہ ادا کیا۔

وزیراعظم نے اس بات پر زور دیا کہ دونوں ممالک کے درمیان منظم اور وسیع البنیاد رابطے دوطرفہ اور علاقائی شعبوں میں دونوں ممالک کے مشترکہ اہداف کو آگے بڑھانے کے عمل کے حوالہ سے اہم ہے۔

اس موقع پر امریکی سفیر نے کہا کہ امریکہ سیلاب سے بحالی کے ساتھ ساتھ معاشی ترقی اور اصلاحات کے لئے حکومت پاکستان کی کوششوں کی حمایت جاری رکھے گا۔