پی ٹی آئی کا الیکشن کمیشن سے پنجاب میں 22 پولیس افسران کی تعیناتی روکنے کا مطالبہ

پاکستان تحریک انصاف نے الیکشن کمیشن سے پنجاب کے نگراں سیٹ اپ میں سانحہ 25مئی میں ملوث 22افسران کی تعیناتی روکنے کا مطالبہ کردیا۔

تحریک انصاف کے سیکرٹری جنرل اسد عمر نے الیکشن کمیشن کے نام خط لکھا ہے جس میں پنجاب میں مختلف پولیس افسران کی تعیناتیوں کے حوالے سے تحفطات کا اظہار کیا ہے۔ خط میں کہا گیا ہے کہ نبیل اعوان ، کیپٹن عثمان ، عمر شیر چھٹہ ، سمیر سید، محمد علی رندھاوا ، اجمل بھٹئ ، احمد رضا سرور ، عامر کریم خان ، ڈاکٹر راشد منصور ، عامر خٹک اور سید علی مرتضی 25 مئی کے واقعات میں ملوث ہیں۔

اس کے علاوہ خط میں بلال صدیق کمیانہ ، کیپٹن عثمان انور , کیپٹن سہیل چوہدری، راؤ سردار علی خان ، رضا صفدر کابنی ، ڈاکٹر عابد خان ، کیپٹن سہیل چوہدری، حافظ عطا الرحمن ، بابر سرفراز ، سہیل ظفر چھٹہ ، رانا ایاز سلیم اور سید علی ناصر رضوی کے نام بھی شامل ہیں۔

خط میں الیکشن کمیشن سے استدعا کہا گیا ہے کہ ان تمام پولیس افسران کو نگراں سیٹ اپ میں تعینات نہ کیا جائے۔

دوسری جانب میڈیا سے بات کرتے ہوئے اسد عمر نے کہا کہ ملک میں اس وقت تاریخ کی بدترین مہنگائی ہے، براہ راست عوام کی زندگی اجیرن کی جارہی ہے، لاکھوں لوگ نوکریوں سے محروم ہوگئے ہیں۔

اسد عمر نے کہا کہ پی ڈی ایم سے وابستہ لوگوں کو خیبرپختونخوا نگراں کابینہ کاحصہ بنا دیا گیا، یہ آئین کی کھلم کھلا خلاف ورزی کررہے ہیں، ایک بار پھر ثابت کر دیا کہ آئین موجودہ نظام میں کوئی حیثیت نہیں رکھتا

رہنما پی ٹی آئی نے کہا کہ عمران خان دلیرانہ فیصلہ کرنے والے آدمی ہیں ، ملک کے عوام نے اپنی تقدیر کافیصلہ کرلیا ہے، قوم اس وقت عمران خان کے ساتھ کھڑی ہے، ہمارا ایک ہی مطالبہ ہے کہ ملک میں الیکشن کی تاریخ کااعلان کیا جائے۔