مریم نواز کی وطن واپسی کا پروگرام تیسری بار تبدیل

مسلم لیگ ن کی سینیر نائب صدر اور چیف آرگنائزر مریم نواز شریف ( Maryam Nawaz Sharif ) کے وطن واپسی کے پروگرام میں تیسری بار تبدیلی کردی گئی ہے۔ وہ اب ہفتے کے روز 28 جنوری کو 3 بجے پاکستان پہنچیں گی۔

دھند کی لہر کے باعث مریم نواز کی وطن واپسی کے شیڈول میں تبدیلی کرنا پڑی۔ وہ اب ہفتہ کو غیرملکی ایئرلائن کی پرواز ای کے چھ سوبائیس کے ذریعے دبئی سے لاہور پہنچیں گی۔

یہاں یہ بات بھی قابل ذکر ہے کہ مریم نواز تقریبا ساڑھے تین ماہ کے بعد وطن واپس پہنچ رہی ہیں۔ وہ گزشتہ سال چھ اکتوبرکو لندن روانہ ہوئی تھیں۔

مسلم لیگ ن کی سینیر نائب صدر مریم نواز اب چیف آرگنائزر کی حیثیت سے انتخابی مہم میں پیش پیش رہنے کے ساتھ پارٹی کو بھی منظم کریں گی۔

مریم نواز کی وطن واپسی کیلئے ن لیگ نے تیاریاں مکمل کرلی ہیں، ہر ایم پی اے اور ایم این اے ایک ہزار کارکنان کو لے کر ائیر پورٹ پہنچے گا۔

مریم نواز کی وطن واپسی کے موقع پر شہر کو استقبالیہ بینرز اور پوسٹرز سے سجانے کا آغاز کر دیا گیا ہے۔ وطن واپسی پر مریم نواز لاہور ایئرپورٹ پر کارکنوں اور میڈیا سے گفتگو کریں گی۔ انہیں ریلی کی صورت میں ایئرپورٹ سے جاتی امرا رائیونڈ لے جایا جائے گا، جب کہ راستے میں جگہ جگہ استقبالیہ کیمپ بھی لگائے جائیں گے۔

واضح رہے کہ اس سے قبل دو بار مریم نواز کی پاکستان واپسی کا شیڈول تبدیل کیا گیا۔

قبل ازیں یہ خبر سامنے آئی تھی کہ مریم نواز شریف 22 جنوری کو پاکستان پہنچیں گی اور نچلی سطح تک پارٹی کو متحرک کرنے کے لئے ذمہ داران کو ٹاسک تفویض کریں گی۔