غیرمسلموں کے طلاق سرٹیفکیٹ سے متعلق 90 روز میں قواعد بنانے کا حکم

لاہور ہائیکورٹ نے پنجاب حکومت کو غیر مسلموں کیلئے طلاق سرٹیفکیٹ سے متعلق 90 روز میں قواعد بنانے کا حکم دیدیا۔ عدالت نے قرار دیا کہ پنجاب لوکل گورنمنٹ ایکٹ کے تحت رولز کا اجراء ضروری ہے، رولز بنائے جانے تک نادرا رجسٹریشن پالیسی کے تحت سہولت فراہم کرے۔

لاہور ہائی کورٹ میں غیرمسلم خاتون نے طلاق کے بعد والد کے نام سے شناختی کارڈ کے اجراء کی درخواست دائر کی تھی۔

لاہور ہائیکورٹ کے جسٹس طارق سلیم شیخ نے شمائلہ شریف نامی خاتون کی درخواست پر 7 صفحات پر مشتمل تحریری فیصلہ جاری کردیا۔

عدالت نے فیصلے میں لکھا کہ مسیحی برادری کی جانب سے یونین کونسلز کے سرٹیفکیٹ جاری نہ ہونے کی شکایات آرہی ہیں، پنجاب لوکل گورنمنٹ ایکٹ کے تحت رولز کا اجراء ضروری ہے، رولز بنائے جانے تک نادرا رجسٹریشن پالیسی کے تحت سہولت فراہم کرے۔

درخواست گزار شمائلہ شریف کے وکیل نے عدالت کو بتایا کہ یونین کونسل غیر مسلموں کو طلاق سرٹیفکیٹ جاری نہیں کرتی جبکہ یونین کونسل کے طلاق سرٹیفکیٹ کے بغیر نادرا شناختی کارڈ میں تبدیلی نہیں کرتا، جس سے انہیں شدید مشکلات کا سامنا کرنا پڑتا ہے۔