پی آئی اے جعلی ڈگری کیس؛ 117 ملزمان کے اکاؤنٹس منجمد

ایف آئی اے نے پی آئی اے میں جعلی ڈگری پر ملازمت کرنے اور ملازمت دینے والے 117 ملازمین کے اکاؤنٹس منجمد کردیئے۔

ایف آئی اے میں پی آئی اے ملزمان کی جعلی ڈگریوں کے کیس میں اہم پیشرفت سامنے آئی ہے، ایف آئی اے کرائم سرکل نے دھوکا دہی اور ریکارڈ میں رد و بدل کے الزام میں پی آئی اے کے 117 ملزمان کے اکاونٹس منجمد کر دئیے ہیں۔

ذرائع کا کہنا ہے کہ ایف آئی اے نے پی آئی اے کے جعلی ڈگریاں رکھنے والے ملزمان کے اکاونٹس منجمد کرکے 9 کروڑ روپے کی ریکوری کرلی ہے۔

ایف آئی اے ذرائع کے مطابق پی آئی اے کے جعلی ڈگری پر ملازمت کرنے والے 117 ملازمین کے خلاف مقدمہ درج کر رکھا ہے، اور ان ملازمین کیخلاف ایف آئی اے نے چالان تیار کر لیا ہے، اور تحقیقاتی رپورٹ جلد عدالت میں جمع کرائی جائے گی۔

ذرائع ایف آئی اے کا کہنا ہے کہ پی آئی اے میں جعلی ڈگریوں پرملازمت حاصل کرنے والوں میں اسسٹنٹ اور سپروائزر عہدے کے ملازمین کے علاوہ
جعلی ڈگریوں پر ملازمت دینے والے ریکروٹمنٹ بورڈ کے اعلی پی آئی اے افسران شامل ہیں۔