عدالت نے الیکشن کمیشن کو عمران خان کے خلاف کارروائی سے روک دیا

لاہور ہائی کورٹ نے الیکشن کمیشن آف پاکستان کو پاکستان تحریک انصاف ( پی ٹی آئی) کے چیئرمین عمران خان کیخلاف ہر قسم کی کارروائی سے روک دیا ہے۔

لاہور ہائی کورٹ کے جج جسٹس جواد حسن نے چیئرمین پی ٹی آئی اور سابق وزیراعظم عمران خان کی الیکشن کمیشن کی کارروائی کیخلاف آج بروز جمعرات 5 جنوری کو درخواست پر سماعت کی۔

دوران سماعت لاہور ہائی کورٹ نے دوسری بار الیکشن کمیشن کو عمران خان کیخلاف پارٹی چیئرمین شپ سے ہٹانے کی کارروائی سے روک دیا ہے اور الیکشن کمیشن آف پاکستان کو نوٹس جاری کر کے جواب طلب کر لیا ہے۔

واضح رہے کہ پی ٹی آئی چیئرمین عمران خان نے الیکشن کمیشن کے خلاف لاہور ہائی کورٹ سے رجوع کیا ہے، عمران خان نے درخواست میں الیکشن کمیشن کی اپنے خلاف کارروائی کو چیلنج کیا ہے۔

چیئرمین پاکستان تحریک انصاف عمران خان کی جانب سے لاہور ہائی کورٹ میں الیکشن کمیشن کے خلاف دائردرخواست میں موقف اختیار کیا گیا ہے کہ الیکشن کمیشن اپنے اختیارات سے تجاوز کر کے پارٹی عہدے سے ہٹانے کی کارروائی کر رہا ہے۔