وفاقی وزیراطلاعات مریم اورنگزیب کی اداکاروں کی کردارکشی کی مذمت

وفاقی وزیراطلاعات مریم اورنگزیب نے اداکاروں کی کردارکشی مہم کی مذمت کرتے ہوئے ایف آئی اے سے ملوث عناصر کیخلاف قانونی کارروائی کا مطالبہ کیا ہے۔

مریم اونگزیب کا کہنا ہے کہ صرف اپنی ماؤں بہنوں کی فکر اور باقی عورتوں کی عزت نہ کرنے والے ذہنی بیمار ہیں۔ پورے معاشرے کو بدتمیزی، بدتہذیبی کی غلیظ مہم کا کلچر پھیلانے والوں کی مذمت کرنی چاہیے۔

وزیراطلاعات نے کہا کہ اداکار ملک کا اثاثہ اور پہچان ہیں، بیمار ذہن ہی اُن پر حملے کرتے ہیں۔ اختلاف رائےکرنےوالوں کو گالیاں دینا،دوسروں کی ماؤں بہنوں کی عزت نہ کرنا ’’گھریلو تربیت‘‘ کی علامات ہیں۔

جاری بیان میں مزید کہا گیا ہے کہ فنکار اپنی محنت سے معاشرے میں مقام حاصل کرتے ہیں، خواتین کسی شعبے میں مقام پائیں تو اُنکی کردار کشی شروع کر دی جاتی ہے، عورتوں کی محنت اور صلاحیتوں کا اعتراف و احترام نہ کرنا اور اُن پر گند اچھالنا شرمناک ہے۔