جنرل باجوہ تمہارے خلاف پلان بنارہے تھے تو تاحیات ایکسٹینشن کی آفر کیوں دی؟وزیر اطلاعات

وزیراطلاعات مریم اورنگزیب کہتی ہیں عمران خان کا بیانیہ موسمیاتی تبدیلی کا شکار ہوگیا ہے۔

وفاقی وزیراطلاعات نے چیئرمین پی ٹی آئی کے انٹرویو پر ردعمل میں کہا کہ موسم کے حساب سے عمران خان کے بیانات بدل رہے ہیں۔ عمران صاحب 2018 سے اپریل 2022 تک ملک کے ساتھ جو ہوا وہ بھی یاد کریں، پاکستان کو ڈیفالٹ کرانے کا آپ کا منصوبہ فیل ہوگیا۔

مریم اورنگزیب نے کہا کہ جنرل باجوہ نے 2021 سے اپریل 2022 تک جو کیا ، وہ عمران خان کو اب یاد آرہا ہے؟ پہلے کہاسوچ بھی نہیں سکتا تھا یہ شہباز شریف کو وزیراعظم بنائیں گے، اب کہتا ہے کہ مجھے گرمیوں میں پتہ چل گیا تھا۔

وزیر اطلاعات مریم اورنگزیب نے کہا کہ عمران خان تم اپنے 4 سال کا حساب دو۔ جنرل باجوہ تمہارے خلاف پلان بنارہے تھے تو پھر تاحیات ایکسٹینشن کی آفرکیوں دی اور بہترین سپہ سالار ہونے کا تمغہ کیوں دیا؟ سینیٹ الیکشن اور اپنی نااہلی بچانے میں جنرل باجوہ کی مدد کیوں لی؟

مریم اورنگزیب کا کہنا تھا کہ فارن ایجنٹ، توشہ خانہ چور، ہیروں کا بیوپاری اور قومی مفادات بیچنے والا کہتا ہے میں نے کیا ہی کیا ہے؟ عمران صاحب جنرل باجوہ کے ہوتے ہوئے اگر رول آف لاء تباہ ہوا تو رول آف لاء کے کسٹوڈین آپ تھے۔

وزیراطلاعات نے کہا عمران خان کی آڈیو لیکس سیاسی انجینئرنگ اورسیاسی خرید وفروخت کا ثبوت ہیں۔