پی ٹی آئی کی اہم اتحادی جماعت کا پرویز الٰہی کو اعتماد کا ووٹ نہ دینے کا فیصلہ

پاکستان تحریک انصاف کی کئی برسوں سے اتحادی جماعت مجلس وحدت المسلمين نے وزیر اعلیٰ پنجاب چوہدری پرویز الٰہی کو اعتماد کا ووٹ نہ دینے کا فیصلہ کیا ہے۔

مجلس وحدت المسلمين (ايم ڈبليو ايم) اور پاکستان تحریک انصاف 2014 سے اتحادی جماعتیں ہیں، دونوں جماعتوں نے ناصرف عام انتخابات بلکہ گلگت بلتستان اور آزاد کشمیر میں بھی مل کر انتخابات میں حصہ لیا تھا۔

تحریک انصاف کی اتحادی جماعت نے وزیراعلی پنجاب چوہدری پرویز الٰہی پر عدم اعتماد کا اظہار کردیا ہے۔

ايم ڈبليو ايم کی پوليٹيکل کونسل نے کہا ہے کہ پنجاب اسمبلی میں ان کی رکن زہرا نقوی چوہدری پرویز الہی کو اعتماد کا ووٹ نہیں دیں گی۔

پوليٹيکل کونسل نے کہا ہے کہ پرویز الہی کو اعتماد کا ووٹ نہ دینے کا فیصلہ ان کے بعض اقدامات کے باعث کیا گیا ہے۔