بے مثال پھرتی اور ذہانت کا شاہکار مائیکل نیسر کا ناقابل یقین کیچ

بگ بیش میں برسبین ہیٹ کے مائیکل نیسر نے ناقابل یقین کیچ لیکر سب کو حیران کردیا۔

آسٹریلوی کرکٹر نے باؤنڈری لائن کے باہر گیند کو ٹچ کرتے وقت اپنے پاؤں زمین پر نہ لگنے دیے، ہوا میں اچھل کر گیند کو فیلڈ میں واپس لائے اور پھرتی سے کیچ پکڑلیا۔

فیلڈنگ کے اس شاندار مظاہرے کے باوجود شائقین اور ماہرین اس کیچ پر سوالات اٹھارہے ہیں۔

مائیکل نیسر باؤنڈری پر کیچ لینے کے بعد گیند کو ہوا میں اچھال دیتے ہیں جسے وہ باونڈری کے باہر جاکر پیروں کو زمین پر لگائے بغیر ایک پار پھر کیچ کرتے ہیں اور واپس فیلڈ کی طرف گیند کو اچھالتے ہیں، بعد میں وہ پھرتی سے واپس باؤنڈری کے اندر آکر کیچ کرلیتے ہیں۔

اس حیران کن کیچ نے بیٹسمین کیساتھ کمنٹیٹرز کو بھی حیران کردیا جسے امپائرز نے کرکٹ قوانین کے مطابق آوٹ قرار دیا۔

کرکٹ قوانین کے مطابق باؤنڈری لائن پر کیچ پکڑنے کے دوران اگر فیلڈر باؤنڈری لائن کے باہر بھی چلا جائے لیکن اسکے پاؤں کا گیند کی ہاتھوں میں موجودگی کے ساتھ زمین سے رابطہ قائم نہیں ہوتا تو اس صورت میں کیچ کو درست مانا جائے گا اور بیٹسمین آؤٹ ہوجائیگا۔