روس فوجیوں کا مورال بڑھانے کیلئے گلوکاروں کو اگلے مورچوں پر بھیجے گا

روس نے میدان جنگ میں اپنے فوجیوں کا حوصلہ بڑھانے کیلئے گلوکاروں سے مدد لینے کا فیصلہ کرلیا۔

روس کا کہنا ہے کہ وہ میدان جنگ میں فوجیوں کا مورال بڑھانے کے لیے گلوکاروں کو یوکرین میں اگلے مورچوں پر بھیجے گا۔

روسی وزارت دفاع نے ”فرنٹ لائن تخلیقی بریگیڈ“ کے قیام کا اعلان کرتے ہوئے کہا ہے کہ اس میں گلوکار اور موسیقار دونوں شامل ہوں گے۔

روسی میڈیا کے مطابق تخلیقی بریگیڈ پیشہ ور فنکاروں پر مشتمل ہے جسے فرنٹ لائن پر فوجیوں کی نفسیاتی حالت کو برقرار رکھنے کا کام سونپا جائے گا۔

یوکرین جنگ میں بڑے پیمانے پر جانی نقصان، کمزور قیادت، تنخواہ کے مسائل، ساز و سامان اور گولہ بارود کی کمی اور جنگ کے مقاصد واضح نہ ہونے کی وجہ سے روسی فوجی مایوسی کا شکار ہیں جس کی وجہ سے روس کو مشکلات کا سامنا ہے۔

درین اثنا روسی وزیر دفاع سرگئی شوئیگو نے یوکرین میں فرنٹ لائن مورچوں کا دورہ کرکے روسی یونٹوں کی پوزیشنوں کو چیک کیا، انہوں نے روسی فوجیوں سے میدان جنگ کی صورتحال پر بات چیت بھی کی۔

یوکرین کے جنرل اسٹاف کے مطابق مشرقی ڈونباس میں روس اور یوکرین کے فوجیوں میں شدید جھڑپیں جاری ہیں۔

مغربی انٹیلی جنس حکام کا کہنا ہے کہ قصبے پر روسی حملوں کی قیادت نجی ملٹری کنٹریکٹر واگنر گروپ کر رہے ہیں، ماسکو کو امید ہے کہ اس قصبے کو یوکرین کے زیر قبضہ شہروں کراماتورسک اور سلوویانسک پر حملے کرنے کے لیے میدان کے طور پر استعمال کرے گا۔

اُدھر یوکرین کے دارالحکومت کیف میں بجلی بحال کر دی گئی ہے، روس نے جمعہ کو یوکرین کے بجلی اور پانی کے بنیادی ڈھانچے کو تباہ کرنے کیلئے وسیع پیمانے پر حملے شروع کیے تھے۔

ماسکو نے جمعہ کو 76 میزائل داغے جس نے نو پاور سپلائی اسٹیشنوں کو نشانہ بنایا اور ملک کا بیشتر حصہ تاریکی میں ڈوب گیا۔