عمران خان اپنی گھٹیا سیاست میں بچوں کونہ گھسیٹیں،مریم اورنگزیب

وزیراطلاعات مریم اورنگزیب نے عمران خان کو ذہنی مریض قرار دیتے ہوئے کہا ہے کہ عوام نے عمران خان کا چور چور کا جھوٹا بیانیہ سننا بند کر دیا ہے۔

عمران خان کے خطاب پر تبصرہ کرتے ہوئے مریم اورنگزیب کا کہنا تھا کہ پنجاب حکومت کے ذریعے تعلیمی اداروں کو سیاسی اکھاڑا بنایا جا رہا ہے، نوجوان تقسیم اور فساد کی سیاست سے دور جا رہے ہیں، بچوں کو گھٹیا سیاست میں گھسیٹنے کا سلسلہ بند کیا جائے۔

وزیر اطلاعات نے کہا کہ پی ٹی آئی پنجاب حکومت کے ذریعے اسکولوں، درسگاہوں، کالجوں اور یونیورسٹیوں کو اختیارات کا ناجائز استعمال کرتے ہوئے سیاسی اکھاڑہ بنانے کی کوشش کر رہی ہے جو نوجوان نسل کے لئے کسی طور بھی درست نہیں ہے۔

مریم اورنگزیب نے کہا کہ یہ بچے جانتے ہیں کہ 2018ء میں ملک 6.1 کی شرح سے ترقی کر رہا تھا، مہنگائی 3 فیصد پر تھی، ملک میں 14 ہزار میگاواٹ بجلی بن چکی تھی، سی پیک کے منصوبے چل رہے تھے، نوجوانوں کو روزگار مل رہا تھا۔

انہوں نے کہا کہ اختیارات کا ناجائز استعمال کرتے ہوئے بچوں کو گھٹیا سیاست میں گھسیٹنے کی کوشش نہ کی جائے۔ وزیر اطلاعات نے کہا کہ توشہ خانہ اوپن اینڈ شٹ کیس ہے، یہ صرف گھڑیوں کا معاملہ نہیں، عمران خان نے اربوں روپے کے تحائف ڈیکلیئر نہیں کئے، گھڑی خریدنے سے پہلے فروخت کی اور پھر پیسے جمع کرائے گئے۔

وزیراطلاعات نے کہا کہ چار سال ملک پر پروپیگنڈا گروہ مسلط تھا، اختیارات موجود تھے، ادارے اور ریکارڈ بھی موجود تھا، انہوں نے جو الزامات عائد کئے، وہ ایک بھی ثابت نہیں کر سکے۔