اسلام آباد انتظامیہ کا پی ٹی آئی کو جاری این او سی منسوخ کرنے پرغور

اسلام آباد انتظامیہ نے پی ٹی آئی کی جانب سے طے شدہ شرائط پر عملدرآمد نہ کرنے پر این او سی کی منسوخی پر غور شروع کر دیا۔

ڈپٹی کمشنر (DC) اسلام آباد نے تحریک انصاف کو 56 شرائط کے ساتھ ایک دن کے جلسے کی اجازت دی تھی، اور کہا تھا کہ انگلینڈ کرکٹ ٹیم کی 27 نومبر کو آمد کے پیش نظر 26 کی رات جلسہ گاہ خالی کرنا ہوگا۔

تاہم اب انتظامیہ نے طے شدہ شرائط پر عملدرآمد نہ کرنے پر تحریک انصاف کو جاری کیا گیا این او سی منسوخ کرنے پرغور شروع کر دیا ہے۔

ڈپٹی کمشنر اسلام آباد کے مطابق انتظامیہ کی مشروط اجازت کے بعد پی ٹی آئی قیادت نے شرائط پر عملدرآمد سے گریز کیا، اور تاحال عمران خان کا دستخط شدہ بیان حلفی پیش نہ کر سکی، جب کہ مقامی قیادت نے عمران خان کا دستخط شدہ بیان حلفی دینے کی یقین دہانی کرائی تھی۔

ڈی سی نے بتایا کہ انتظامیہ نے پی ٹی آئی کو 56 شرائط پر عملدرآمد سے مشروط اجازت دی تھی۔

اسلام آباد انتظامیہ کی مشروط اجازت

ڈی سی اسلام آباد کی جانب سے تحریک انصاف کو جاری کردہ این او سی کے نوٹیفکیشن کے مطابق عمران خان کی جان کو لاحق خطرات کے پیش نظر جلسہ گاہ میں آمد اور روانگی مقررہ روٹس کے علاوہ نہیں ہوگی، جب کہ اسٹیج پر بلٹ پروف روسٹرم رکھنے کے بھی احکامات دیئے گئے ہیں، جلسے کے دوران اسلحہ کی نمائش، عدلیہ اور دیگر اداروں کے خلاف تقاریر نہیں ہوں گی۔

ڈی سی کی جانب سے جاری کیے گئے نوٹیفکیشن میں مزید کہا گیا ہے کہ مذہبی جذبات ابھارنے اور کسی گروہ کے خلاف بات نہیں ہوگی، لاؤڈ اسپیکر کا مخصوص وقت میں ہی استعمال ہوگا، عوام کی آمد و رفت کے دوران تلاشی ہوگی، اسٹیج پر موجود مقررین کے نام اور دیگر تفصیلات سے قبل ازوقت انتظامیہ کو آگاہ کرنا ہوگا۔

مزید برآں عمران خان جلسے میں سن روف والی گاڑی استعمال نہیں کریں گے، جب کہ پی ٹی آئی چیئرمین انتظامیہ اور سیکیورٹی اداروں کا طے شدہ راستہ استعمال کریں گے۔ اس سلسلے میں راول پنڈی پولیس کو جلسے کیلئے سیکیورٹی اقدامات کرنے کے احکامات جاری کیے گئے ہیں۔

جلسے کے دوران کسی بھی جانی نقصان کی ذمے دار جلسہ انتظامیہ ہوگی۔ جلسہ ختم ہونے کے بعد کوئی بھی کارکن علامہ اقبال پارک میں نہیں رُکے گا۔