اہم تعیناتیاں: وزیراعظم نے اتحادی جماعتوں کا اجلاس طلب کرلیا

وزیراعظم میاں محمد شہباز شریف نے اتحادی جماعتوں کا اہم اجلاس آج بروز بدھ 23 نومبر کو طلب کرلیا ہے۔

ذرائع کے مطابق وزیراعظم ہاؤس میں آج ہونے والے اہم اجلاس میں آرمی چیف کی تقرری پر مشاورت ہوگی، وزیراعظم پارلیمانی رہنماوں کو اہم تقرریوں سے متعلق فیصلوں پر اعتماد میں لیں گے۔ اجلاس آج شام ساڑھے 6 بجے ہوگا۔

وزیراعظم اتحادیوں کو اہم فیصلوں سے متعلق اعتماد میں لیں گے، جب کہ آج ہونے والی اہم اجلاس میں پاکستان تحریک انصاف ( پی ٹی آئی ) کے لانگ مارچ سمیت اہم سیاسی امور پر بھی مشاورت ہوگی۔

اجلاس میں میں ملک کی مجموعی سیاسی صورت حال پر بھی گفتگو ہوگی۔ وزیراعظم میاں محمد شہباز شریف کی جانب سے اتحادی جماعتوں کے اعزاز میں وزیراعظم ہاؤس میں عشائیہ بھی دیا جائے گا۔

قبل ازیں سابق صدر آصف علی زرداری اور وزیراعظم شہباز شریف کے درمیان ملاقات میں ملکی صورت حال پر تبادلہ خیال کیا گیا۔ پیپلز پارٹی کے شریک چیئرمین آصف علی زرداری وزیراعظم ہاؤس پہنچے تو وزیراعظم شہباز شریف نے ان کا استقبال کیا، اس دوران سابق صدر نے وزیراعظم کی مزاج پرسی کی۔

واضح رہے کہ وزیر اعظم شہباز شریف نے چند ہفتے قبل لندن کا دورہ کیا جہاں انہوں نے نواز شریف سے آرمی چیف کی تعیناتی کے معاملے پر مشاورت کی اور واپسی کے بعد تمام اتحادی جماعتوں کو اعتماد میں لیا۔

یہاں یہ بات بھی قابل ذکر ہے کہ 29 نومبر کو آرمی چیف جنرل قمر جاوید باجوہ اور چیئرمین جوائنٹ چیفس آف اسٹاف عہدے سے سبکدوش ہو رہے ہیں، ان کی تقرری موضوع بحث بن چکی ہے۔ اگر سینیارٹی کا جائزہ لیا جائے تو اس وقت چھ لیفٹیننٹ جنرلز نئے سپہ سالار کیلئے امیدوار ہیں۔

ان امیدواروں میں لیفٹیننٹ جنرل عاصم منیر، لیفٹیننٹ جنرل ساحر شمشاد مرزا، لیفٹیننٹ جنرل اظہر عباس، لیفٹیننٹ جنرل نعمان محمود، لیفٹیننٹ جنرل فیض حمید شامل ہیں۔ لیفٹیننٹ جنرل محمد عامر کا نام بھی اس میں شامل ہیں۔

موجود آرمی چیف جنرل قمر جاوید باجوہ کی ریٹائرمنٹ پر 29 نومبر کو چین آف کمانڈ کی تبدیلی کی تقریب ہوگی جہاں روایتی طور پر سابق آرمی چیف اپنی چھڑی نئے آرمی چیف کو پیش کریں گے۔

وزیراطلاعات مریم اورنگزیب نے کہا ہے کہ وزیراعظم شہباز شریف متعین طریقہ کارکے مطابق تعیناتیوں کا فیصلہ کریں گے۔

مریم اورنگزیب نے اپنے بیان میں کہا کہ وزارت دفاع کی جانب سے بھجوائی گئی سمری وزیراعظم آفس کو موصول ہوگئی ہے، سمری میں چیئرمین جوائنٹ چیفس آف اسٹاف کمیٹی اور چیف آف آرمی اسٹاف کے عہدوں پر تقرری کے لئے ناموں کا پینل بھجوایا گیا ہے۔

وفاقی وزیر اطلاعات کا مزید کہنا تھا کہ وزیراعظم شہبازشریف متعین طریقہ کار کے مطابق ان تعیناتیوں سے متعلق فیصلہ کریں گے۔