انسٹاگرام میں خرابی، لاکھوں صارفین کو اکاؤنٹس معطل ہونے کا نوٹس

فوٹو اینڈ ویڈیو شیئرنگ پلیٹ فارم انسٹاگرام ایک مرتبہ پھر سے ڈاؤن ہوگیا، ساتھ ہی لاکھوں صارفین کو ان کے اکاؤنٹس معطل ہونے کے نوٹس بھی جاری ہوگئے۔

رپورٹس کے مطابق انسٹاگرام کے صارفین کو انسٹاگرام کی جانب سے ایک نوٹیفیکیشن موصول ہورہا ہے جس میں انہیں بتایا جارہا ہے کہ ان کا اکاؤنٹ معطل ہوگیا ہے۔

انسٹاگرام کے بعض صارفین کی جانب سے یہ شکایت کی جارہی ہے کہ انسٹاگرام کی سروس آج دوپہر سے ہی ڈاؤن ہے۔

دوسری جانب انسٹاگرام صارفین کو اپنا اکاؤنٹ کھولتے وقت اکاؤنٹ معطلی کا پیغام مل رہا ہے، تاہم اکاؤنٹس معطل ہونے کی کوئی وجہ بھی نہیں بتائی گئی۔

رپورٹ کے مطابق اکاؤنٹ معطلی کا میسج صارفین کو ان کا اکاؤںٹ کھولتے وقت آرہا ہے، جس میں انسٹاگرام کی جانب سے بتایا جارہا ہے کہ آپ کا اکاؤنٹ 31 اکتوبر 2022ء کو معطل کیا جارہا ہے، آپ اس فیصلے سے 30 دن کے اندر تک غیر متفق ہوسکتے ہیں۔

انسٹاگرام کی جانب سے سماجی رابطوں کی ویب سائٹ ٹوئٹر پر اپنے پیغام میں کہا گیا ہے کہ ہمیں اس بات کا علم ہے کہ آپ میں سے بہت سے لوگوں کو اپنے انسٹاگرام اکاؤنٹ تک رسائی میں دشواری آرہی ہے، ہم اس پر معذرت خواہ ہیں، اس معاملے کو دیکھا جارہا ہے۔

تاہم کئی گھنٹے بعد بالآخر اس مسئلے کو حل کرلیا گیا، انسٹاگرام نے ٹوئٹر پر ہی پیغام میں صارفین کو آگاہ کیا۔