روڈا کو سپریم کورٹ کے احکامات کی خلاف وزری سے روک دیا گیا

لاہور ہائی کورٹ نے روڈا کو سپریم کورٹ کے احکامات کی خلاف وزری سے روک دیا۔

لاہور ہائیکورٹ نے روڈا ترمیمی ایکٹ کے خلاف دائر درخواست پر سماعت کی۔

درخواست گزار کی جانب سے موقف اختیار کیا گیا کہ روڈا اتھارٹی قانون کے برعکس کام کررہی ہے، سپریم کورٹ نے روڈا کو مزید زمین حاصل کرنے سے روک رکھا ہے، روڈا اتھارٹی ایکٹ میں ترمیم کا سہارا لے کرکاروائیاں کررہی ہے۔

جسٹس شاہد کریم نے حکم دیا کہ سپریم کورٹ کے احکامات کی خلاف وزری نہ کی جائے۔

دوسری جانب متاثرین نے روڈا کو کارروائیوں سے روکنے پر عدلیہ پر اظہار اعتماد کیا ہے۔

رہنما متاثرین روڈا پیر اشرف رسول کا کہنا ہے کہ روڈا کی غیرقانونی کاروائیاں رکوانےکا عدالتی حکم خوش آئند ہے، عدالت عالیہ کا حکم امتناع متاثرین کے موقف کی جیت ہے

رہنما متاثرین روڈا نے کہا کہ روڈا ماحولیاتی تبدیلی اور قوانین کی دھجیاں اڑا رہا تھا، پنجاب حکومت اور روڈا عمران خان کی کرپشن میں سہولت کاری کررہی ہے۔

اس موقع پر مصطفٰی رشید نے کہا کہ عدالت نے واضح کیا کہ روڈا سپریم کورٹ کے31 جنوری کے احکامات کی خلاف ورزی نہ کرے، لاہور ہائی کورٹ کے احکامات روڈا کے خلاف غریب کسانوں کی بڑی فتح ہے، کسانوں کيخلاف درج مقدمات کو بھی ختم کیا جائے۔