پشاور ہائیکورٹ کا ریگنگ میں ملوث طلباء کو کالج سے نکالنے کا حکم

پشاور ہائی کورٹ نے کالج انتظامیہ کو نئے اسٹوڈنٹس کو تنگ کرنے والے طلباء کے خلاف کارروائی کا حکم دیتے ہوئے تمام کالجز کو طلباء کے ساتھ فولنگ کے خلاف اقدامات کی ہدایت کردی۔

پشاور ہائیکورٹ میں فرسٹ ایئر طلبہ کے ساتھ ریگنگ کے مسئلے پر کیس کی سماعت میں عدالت نے کالجز کو اقدامات کی ہدایت کردی۔

عدالت نے اسلامیہ کالج یونیورسٹی کے وی سی کو ریگنگ کرنے والے طلباء کے خلاف کارروائی کا حکم دیتے ہوئے کہا کہ اگر دوبارہ ایسا واقعہ ہوا تو پھر وائس چانسلر ذمہ دار ہونگے۔

پشاور ہائیکورٹ کے چیف جسٹس نے سماعت کے دوران کہا کہ سوشل میڈیا پر اسلامیہ کالج کے طلباء کی ویڈیوز میں نئے طلباء کو برے طریقے سے تنگ کیا جارہا ہے۔

چیف جسٹس نے کہا کہ ایسی ویڈیوز آرہی ہے ان سے بچے مایوس ہوکر بعض دفعہ کالج بھی چھوڑ دیتے ہیں۔

عدالت نے وی سی کو ہدایت کی کہ کوئی طالبعلم نئے اسٹوڈنٹس کو تنگ کرے تو ان کے والدین کو آگاہ کرکے ان کو کالج سے نکال دیں۔