آئی سی سی ٹی 20 رینکنگ،بابراعظم کے لیےبری خبر

آئی سی سی نے پلیئرز رینکنگ جاری کردی ہے جس میں پاکستان کے محمد رضوان ٹی 20 بیٹرز میں پہلے نمبر پر برقرار ہیں۔ پاکستان کے کپتان بابراعظم رینکنگ میں تیسرے نمبر پرآگئے ہیں۔

آئی سی سی پلئیرز رینکنگ میں ٹی 20 فارمیٹ میں محمد رضوان نے نمبر ون پوزیشن کو مزید مستحکم کر لیا ہے۔ محمد رضوان کے رینکنگ پوائنٹس 825 سے بڑھ کر 861 ہوگئے ہیں۔

بھارت کے سوریا کمار یادیو کا دوسرا نمبر ہوگیا ہے جبکہ پاکستان کے کپتان بابر اعظم رینکنگ میں تیسرے نمبر پر آگئے ہیں۔ وہ پہلے دوسرے نمبر پرتھے۔

جنوبی افریقا کے ایڈن مارکرم چوتھے نمبر پر چلے گئے ہیں۔ انگلینڈ کے ہیری بروک اور بین ڈکٹ کی رینکنگ میں 8 درجے ترقی ہوئی ہے۔ ہیری بروک 29 ویں اور بین ڈکٹ 32ویں نمبر پرآگئے ہیں۔ فخر زمان 64 ویں نمبر پر چلے گئے ہیں۔

ٹی 20 بولرز رینکنگ میں آسٹریلیا کے جوش ہیزل ووڈ کا پہلا نمبر برقرار ہے۔ جنوبی افریقا کے تبریز شمسی دوسرے اور انگلینڈ کے عادل رشید تیسرے نمبر پر موجود ہیں۔ افغانستان کے راشد خان چوتھے اور سری لنکا کے وانندو ہاسارنگا پانچویں نمبر پر آ گئے ہیں۔

پاکستان کے فاسٹ بولر حارث رؤف کی رینکنگ میں 2 درجے ترقی ہوئی ہے اور وہ رینکنگ میں 14 ویں نمبر پرآگئے ہیں۔

شاداب خان 16 ویں اور شاہین آفریدی 24 ویں نمبر پر چلے گئے ہیں۔محمد نواز 2 درجہ ترقی کرکے 31 ویں نمبر پر آگئے ہیں۔ محمد حسنین 90 ویں نمبر پر ہیں۔

ٹی 20 آل راؤنڈرز میں محمد نبی کی رینکنگ میں 1 درجے ترقی ہوئی ہے اور وہ نمبر ون آل راؤنڈر بن گئے ہیں۔ بنگلہ دیش کے شکیب الحسن دوسرے نمبر پر آگئے ہیں۔