مفتاح اسماعیل وزارت سے مستعفیٰ،اسحاق ڈار وزیرخزانہ نامزد

اسحاق ڈار منگل کو وزیرخزانہ کا حلف اٹھائیں گے
Sep 25, 2022

وزیراعظم شہباز شریف نے مفتاح اسماعیل کے مستعفی ہونے کے بعد اسحاق ڈار کو وزیر خزانہ کے عہدے کے لیے نامزد کر دیا۔

لندن میں قائد ن لیگ نوازشریف کی زیرصدارت لیگی قائدین کے اجلاس میں ملک کی مجموعی سیاسی و قومی صورتحال پرغورکیا گیا۔

اجلاس میں وزیرخزانہ مفتاح اسماعیل نے نوازشریف کو استعفیٰ پیش کردیا جس کے بعد نوازشریف اور وزیراعظم شہبازشریف نے اسحاق ڈار کو وزیرِخزانہ کیلئے نامزد کردیا۔

مفتاح اسماعیل کا کہنا تھا کہ وزارت آپ کی امانت تھی،آپ نے ہی وزیربنایا تھا۔ 4 ماہ بھرپور صلاحیت سے کام کیا اور پارٹی وملک سے وفاداری نبھائی۔

اجلاس میں شرکاء کا کہنا تھا کہ سابق دورمیں لگائی معاشی تباہی کی آگ حکومت کو بجھانا پڑی جبکہ نوازشریف نے مشکل حالات میں ذمہ داریاں نبھانے پر مفتاح کی کوششوں کو سراہا۔

اجلاس کے بعد ٹویٹر پیغام میں مفتاح اسماعیل کا کہنا تھا کہ وزیراعظم شہبازشریف اور قائد ن لیگ نوازشریف سے ملاقات میں وزارت سے زبانی استعفیٰ دے دیا تاہم پاکستان واپسی پر باقاعدہ طور پر تحریری استعفیٰ جمع کراؤں گا۔ انہوں نے مزید لکھا کہ دو مرتبہ ملک کا وزیرخزانہ بننا باعث فخر ہے۔

دوسری جانب وزیراعظم شہبازشریف اور نواز شریف کی ملاقات میں یہ فیصلہ بھی کیا گیا کہ اسحاق ڈار وزیراعظم شہبازشریف کے ہمراہ پاکستان روانہ ہوں گے۔

ذرائع کے مطابق اسحاق ڈار منگل کو وزیر خزانہ کی حیثیت سے حلف اٹھائیں گے جبکہ موجودہ وزیر خزانہ مفتاح اسماعیل بھی ن لیگ کی اتحادی حکومت میں معاشی ٹیم کا حصہ ہوں گے۔

Tabool ads will show in this div