ترقی یافتہ پاکستان کی بنیاد قانون کی حکمرانی ہے، چیف جسٹس

چیف جسٹس سپریم کورٹ کا کہنا ہے کہ ترقی یافتہ پاکستان کی بنیاد قانون کی حکمرانی ہے، پارلیمان اور حکومت عدالتی فیصلوں پر عملدرآمد کیلئے مؤثر نظام بنائیں، آئین کے احترام سے ہی ملک آگے بڑھ سکتا ہے۔

چیف جسٹس آف پاکستان جسٹس عمر عطاء بندیال نے جوڈیشل کانفرنس کے اختتامی سیشن سے خطاب کرتے ہوئے کہا کہ توقع ہے کانفرنس سے عام آدمی کی انصاف تک رسائی میں بہتری آئے گی، تنازعات کے حل کا متبادل نظام فوری انصاف کیلئے مددگار ثابت ہوگا، وکلاء سائلین کو اے ڈی آر کا مشورہ دیں، عدالتوں میں مقدمات کے حتمی فیصلے تک 15 سال لگ جاتے ہیں، نظام انصاف میں ٹیکنالوجی کے استعمال میں دنیا بہت آگے جاچکی ہے۔

ان کا کہنا ہے کہ سپریم کورٹ نے 7 ماہ میں 3300 سے زیادہ مقدمات کے فیصلے ویڈیو لنک پر کئے، ویڈیو لنک سے وکلاء اور سائلین کے وقت اور پیسے کی بچت ہوئی، ملک کی تمام عدالتوں کو بذریعہ آٹومیشن سسٹم آپس میں لنک کیا جارہا ہے، پولیس اور پراسیکیوشن کو جرائم پر قابو پانے کیلئے مزید تربیت کی ضرورت ہے۔

چیف جسٹس نے مزید کہا کہ ضلعی عدلیہ کو نئی ترامیم سے آگاہی کیلئے تربیتی سیشنز کی ضرورت ہے، آبادی میں اضافہ، موسمیاتی تبدیلیاں اور صنفی تفریق فراہمی انصاف میں رکاوٹ بن رہے ہیں، جسٹس فائز عیسی نے قرآن کی روح سے مسائل کے حل کی جانب توجہ مبذول کرائی۔

جسٹس عمر عطاء بندیال کا کہنا ہے کہ پارلیمان اور حکومت عدالتی فیصلوں پر عملدرآمد کیلئے مؤثر نظام بنائیں، ترقی یافتہ پاکستان کی بنیاد قانون کی حکمرانی ہے، ترقی یافتہ ملک تب ہی بنے گا جب سب کی انصاف اور عدلیہ تک رسائی ہوگی، فوجداری نظام انصاف میں اسٹیک ہولڈرز باہمی روابط اور استعداد کار بہتر بنائیں، بار اور عدلیہ کو بھی اپنی کارکردگی مزید بہتر بنانی ہوگی۔

انہوں نے کہا کہ خواتین کو حکومت، پارلیمان اور عدلیہ کی فیصلہ سازی میں شریک کیا جانا ضروری ہے، خواتین پر تشدد کے واقعات کی روک تھام ضروری ہے، ریاستی اداروں اور عوام کو ملکر بڑھتی آبادی پر قابو پانا ہوگا، کائنات کا نظام توازن پر قائم ہے، فریقین ہوں یا ادارے سب کے درمیان توازن ضروری ہے، عدلیہ ملک کو سب کیلئے یکساں بنانے کی کوشش کررہی ہے، عوام اور اداروں کی جانب سے آئین کے احترام سے ہی ملک آگے بڑھ سکتا ہے۔