لاپتہ افراد سے لے کر پیناڈول، سب اسلام آباد ہائیکورٹ سے ملتا ہے، شیخ رشید

سابق وزیرداخلہ اور عوامی مسلم لیگ کے سربراہ شیخ رشید کا کہنا ہے کہ لاپتہ شہری کی بازیابی ہو یا پیناڈول گولی کی دستیابی ہائی کورٹ سے ملتی ہے۔

سماجی رابطے کی ویب سائٹ ٹویٹر پر اپنی ٹویٹ میں سابق وفاقی وزیر اور عوامی مسلم لیگ کے سربراہ شیخ رشید کہنا ہے کہ وزیراعظم فیول ایڈجسٹمنٹ معاف کرتے ہیں تو وزیر توانائی مؤخرکردیتے ہیں، صدرپاکستان سیاسی مفاہمت کرائیں گے یا پھر فیصلہ ڈی چوک پر ہوگا۔

شیخ رشید کا کہنا تھا کہ اقوام متحدہ کی 160 ملین کی امداد اونٹ کے منہ میں زیرہ ہے، سیلاب زدگان کی مدد نہیں، صرف فوٹو بنوائے جارہے ہیں۔

سابق وفاقی وزیر نے کہا کہ ایم کیو ایم (MQM) اپنے کارکنان کی لاشیں ملنے کے باوجود حکمرانوں کی سیاسی لاش کے ساتھ کھڑی ہے، لاپتہ شہری کی بازیابی ہو یا پیناڈول گولی کی دستیابی، سب ہائیکورٹ سے ملتا ہے۔

شیخ رشید نے مزید کہا کہ ایسا دکھائی دیتا ہےکہ آرمی چیف کی تعیناتی ہی پاکستان کا سب سے بڑا مسئلہ ہے، مذہبی منافرت پھیلانے والے اورعمران کو دیوار سے لگانےوالےعوام میں جانے کے قابل نہیں ہیں۔