لاہور: سوئمنگ پول سے ملنے والی بچی کی لاش کا معمہ حل ہوگیا

لاہور ( Lahore ) کے علاقے مناواں میں سوئمنگ پول سے ملنے والی بچی کی لاش کا معمہ حل ہوگیا۔ سوئمنگ پول کا مالک ہی مرکزی ملزم نکلا۔

سی سی پی او غلام محمد ڈوگر کے مطابق سوئمنگ پول کے مالک علی رضا نے بچی کو ریپ ( Rape ) کے بعد قتل کیا تھا۔

سی سی پی او نے میڈیا کو کیس میں ہونے والی پیش رفت سے آگاہ کرتے ہوئے بتایا کہ ملزم علی رضا نے بچی کو زیادتی کے بعد گلا دبا کر قتل کیا۔ ملزم نے چالاکی سے قتل کو حادثے کا رنگ دینے کیلئے لاش کو سوئمنگ پول میں پھینکا۔

پولیس کے مطابق بچی اپنے بھائی اور بہن کے ساتھ سوئمنگ پول میں آئی تھی۔ ملزم بچی کو بسکٹ کا لالچ دے کر کینٹین کے عقب میں لے گیا تھا۔ مقتول بچی کے دیگر بہن بھائی نے ملزم علی رضا سے کافی دیر تک بہن سے متعلق پوچھتے رہے، تاہم ملزم نے بچوں کو یہ کہا کہ ان کی بہن گھر چلی گئی ہے۔

بچی کے قتل کے شک پر قانون نافذ کرنے والے حکام نے 11مشکوک افراد کے ڈی این اے اور پولی گراف ٹیسٹ کرائے تھے۔ مقتولہ بچی اور ملزم علی رضا کے نمونے پنجاب فرانزک سائنس لیبارٹری بھجوائے گئے تھے۔

سی آئی اے اور انویسٹی گیشن پولیس کی مشترکا ٹیموں نے شب و روز کی محنت کے بعد ملزم کو گرفتار کیا۔

قتل کا مقدمہ

بچی کے قتل کا مقدمہ 27 اگست کو درج کیا گیا تھا۔ ملزم علی رضا کے خلاف بچی کے بھائی کی مدعیت میں قتل کا مقدمہ درج کیا گیا تھا۔ مقدمے میں 154 ضابطہ فوجداری کے دفعات شامل کی گئی تھیں۔

سی سی پی او کا بیان

کیس سے متعلق بریفنگ کے بعد میڈیا نمائندوں سے گفتگو میں سی سی پی او کا کہنا تھا کہ مضبوط چالان مرتب کرکے ملزم کو کیفر کردار تک پہنچائیں گے۔

اس موقع پر انہوں نے ٹیم کو مبارک باد دیتے ہوئے کہا کہ ہائی پروفائل کیسز حل کرنے پر ڈی آئی جی انوسٹی گیشن اور ان کی ٹیم کو مبارکباد پیش کرتا ہوں۔ یہ ہمارے لیے انتہائی چیلنجنگ کیس تھا، ہم نے اصل ملزم کو بروقت گرفتار کر لیا تھا۔

سی سی پی او کے مطابق وزیراعلیٰ پنجاب نے بھی اس کیس کو فوری حل کرنے اور انصاف کے تقاضے پورے کرنے کا حکم دیا تھا۔