موسمیاتی تبدیلی سےایسےنقصانات نہیں دیکھےجو پاکستان میں ہوئے،انتونیو گوتریس

اقوام متحدہ کے سیکریٹری جنرل انتونیو گوتدریس کا کہنا ہے کہ موسمیاتی تبدیلی سے ہونے والے نقصانات متاثرہ ممالک کی برداشت سے باہر ہوسکتے ہیں، ان موسمیاتی تبدیلیوں سے ہونے والے نقصانات آج سے قبل کبھی نہیں دیکھے جو پاکستان میں سیلاب سے آئے ہیں۔

مائیکرو بلاگنگ سائٹ پر پاکستان کے دورے پر آئے اقوام متحدہ کے سیکریٹری جنرل انتونیو گوتدریس نے کہا کہ یہ ایک عالمی مسئلہ ہے جو مشترکا توجہ کا متقاضی ہے، موسمیاتی تبدیلی سے ہونے والے نقصانات متاثرہ ملکوں کی برداشت سے باہر ہوسکتے ہیں۔

سیکریٹری جنرل کا یہ بھی کہنا تھا کہ زمین کا درجہ حرارت بڑھنے سے ملکوں کو مشکلات کا سامنا کرنا پڑے گا، موسمیاتی تبدیلی سے ایسے نقصانات نہیں دیکھے جو سیلاب سے پاکستان میں ہوئے۔

قبل ازیں یواین سیکریٹری جنرل انتونیو گوتریس پاکستان کا دورہ مکمل کرکے واپس روانہ ہوئے۔ سیلاب سے تباہی کا ذمہ دار جی ٹوئنٹی ممالک کو قرار دیا اور عالمی برادری سے پاکستان کی مدد کی اپیل کی۔ انتونیو گوتریس نے وزیراعظم شہبازشریف اور وزیر خارجہ بلاول بھٹو زرداری کے ساتھ سندھ اور بلوچستان کے سیلاب سے متاثرہ علاقوں کا فضائی جائزہ لیا، ساتھ ہی سیلاب متاثرین کے کیمپس کا دورہ کیا، دورے کے دوران انہوں نے پاکستان میں سیلاب سے تباہی کا ذمہ دار جی ٹوئنٹی ممالک کو قراردیتے ہوئے کہا کہ 80 فیصد کاربن کا اخراج یہی جی ٹونٹی ممالک کرتے ہیں۔

انتونیو گوتریس کا کہنا تھا کہ سوال پاکستان کیلئے امداد کا نہیں، پاکستان کے ساتھ انصاف کا ہے۔عالمی حدت میں پاکستان کا حصہ صرف ایک فیصد ہے لیکن خمیازہ پاکستان بھگت رہا ہے، سیلاب زدہ علاقوں میں دیکھی تباہی الفاظ میں بیان نہیں کی جاسکتی، ترقی یافتہ ملک پاکستان کو تباہی سے نکالنے میں مدد کریں۔

انہوں نے کہا کہ تباہی سے نمٹنے کی پاکستان میں سکت نہیں اور نہ ہی پاکستان اکیلے یہ کرسکتا ہے، اقوام متحدہ پاکستان کی آواز کے ساتھ آواز ملائے گا، بحالی کے آپریشن میں کافی فنڈز کی ضرورت ہوگی، ریلیف اور ریسکیو آپریشن جاری ہے، جس کے بعد بحالی کا آپریشن ہوگا۔

وزیراعظم شہباز شریف

دوسری جانب وزیراعظم میاں شہباز شریف نے کہا ہے کہ سیکریٹری جنرل اقوام متحدہ کی سیلاب متاثرین کی بےمثال معاونت پر مشکور ہیں، پاکستان کواس چیلنج سے نمٹنے کیلئے عالمی برادری کی مددکی ضرورت ہے۔

سماجی رابطے کی ویب سائٹ ٹویٹر پر اپنے پیغام میں وزیراعظم کا کہنا تھا کہ سیکریٹری جنرل اقوام متحدہ سیلاب سے بڑے پیمانے پر تباہی سے دلی طور پر رنجیدہ ہیں، انتونیو گوتریس سیلاب متاثرین کی آواز بن کر ابھرے ہیں۔