سیلاب سے متاثرہ آخری فرد کی بحالی تک چین سے نہیں بیٹھیں گے، آرمی چیف

آرمی چیف جنرل قمر جاوید باجوہ نے بلوچستان کے سیلاب متاثرہ علاقوں کے دورے کے موقع پر کہا کہ سیلاب سے متاثرہ آخری فرد کی بحالی تک چین سے نہیں بیٹھیں گے، کسی حکم کا انتظار کئے بغیر ضرورت مند بھائیوں تک پہنچنا چاہئے۔

سربراہ پاک فوج جنرل قمر جاوید باجوہ نے بلوچستان کے سیلاب سے متاثرہ علاقوں کا دورہ کیا، اس موقع پر انہوں نے گوٹھ سدوری، لاکھڑا، لسبیلہ میں ریلیف اور میڈیکل کیمپ کا معائنہ کیا اور متاثرین سے خیریت دریافت کی۔

اس موقع پر ان کا کہنا تھا کہ عوام کا تحفظ اور فلاح سب سے پہلے ہے، سیلاب سے متاثرہ آخری فرد کی بحالی تک چین سے نہیں بیٹھیں گے، اس مشکل وقت میں عوام کی مدد کیلئے کوئی کسر اٹھا نہیں رکھیں گے۔

انہوں نے کہا کہ کسی حکم کا انتظار کئے بغیر ضرورت مند بھائیوں تک پہنچنا چاہئے۔

آرمی چیف نے امدادی کاموں میں مصروف فوجیوں سے بھی ملاقات کی اور مصیبت زدہ لوگوں کی خدمت کیلئے کوششوں کو سراہا اور جوانوں کو ہدایت کی کہ قدرتی آفت پر قابو پانے کیلئے بہن بھائیوں کی مدد کی جائے۔