فنڈنگ کیس؛ اکبر ایس بابر کا پی ٹی آئی کی اپیل میں فریق بننے کا فیصلہ

تحریک انصاف کے بانی رکن اور ممنوعہ فنڈنگ کیس کے مرکزی فریق اکبر ایس بابر نے تحریک انصاف کی اپیل پر بھی فریق بننے کا فیصلہ کیا ہے۔

رواں ماہ 10 اگست کو تحریک انصاف کی جانب سے الیکشن کا ممنوعہ فنڈنگ کیس کا فیصلہ اسلام آباد ہائی کورٹ میں چیلنج کیا گیا تھا، جس میں پی ٹی آئی نے الیکشن کمیشن کو فریق بناتے ہوئے استدعا کی تھی کہ الیکشن کمیشن کا 2 اگست فیصلہ کالعدم قرار دیا جائے شوکاز نوٹس بھی کالعدم قرار دیا جائے۔

اسلام آباد ہائیکورٹ نے تحریک انصاف ممنوعہ فنڈنگ کیس میں الیکشن کمیشن کے فیصلے کیخلاف اپیل پر سماعت کےلیے لارجر بینچ تشکیل دے دیا ہے جو پی ٹی آئی کی اپیل پرکل سماعت کرےگا۔

دوسری جانب تحریک انصاف کے بانی رکن اور ممنوعہ فنڈنگ کیس کے فریق
اکبر ایس بابر نے اسلام آباد ہائی کورٹ میں پی ٹی آئی کی اپیل میں بھی فریق بننے کا فیصلہ کرلیا ہے۔

اکبر ایس بابر نے اسلام آباد ہوئی کورٹ میں دائر پی ٹی آئی کی اپیل میں فریق بننے کے لئے باضابطہ درخواست دائر کردی ہے، جس میں مؤقف اختیار کرتے ہوئے کہا گیا ہے کہ میں پی ٹی آئی کا ممبر اور کیس کا شکایت کنندہ ہوں، پی ٹی آئی کی پٹیشن میں میرا ذکر موجود ہے لیکن مجھے فریق نہیں بنایا۔

اکبر ایس بابر نے درخواست میں استدعا کرتے ہوئے کہا ہے کہ پی ٹی آئی “کلین ہینڈز” کے ساتھ عدالت نہیں آئی، مجھے لارجر بنچ کے سامنے کیس میں فریق بنایا جائے۔

اکبر ایس بابر کی میڈیا سے گفتگو

ہائی کورٹ کے باہر میڈیا سے بات کرتے ہوئے اکبر ایس بابر کا کہنا تھا کہ ممنوعہ فنڈنگ کیس میں لارجر بینچ تشکیل دیا گیا ہے لیکن اس میں مجھے فریق نہیں بنایا گیا، ہم سمجھتے ہیں جہاں الیکشن کمیشن کے فیصلے کو چیلنج کیا ہے اس میں ہمیں فریق بنایا جائے۔

بانی رکن پی ٹی آئی نے کہا کہ غیر قانونی فنڈ ریزنگ کو غیر قانونی قرار دیا گیا ہے، میں کہتا آیا ہے ہوں یہ پاکستان کی تاریخ کا سب سے بڑا فنڈنگ اسکینڈل ہے ، اس اسکینڈل میں پاکستان تحریک انصاف کے رہنما شریک ہیں۔

اکبر ایس بابر نے کہا کہ فنانشل ٹائمز کی خبر نے ثابت کیا ابراج سے ڈالرز آئے، عمران خان آپ نے سچائی سامنے آنے سے روکنے کیلیے کئی پٹیشن دائر کیں، بارہا کوشش کی گئی کہ ہمیں نکالا جائے۔

اکبر ایس بابر کا کہنا تھا کہ فنانشل ٹائمز کی سٹوری آپ کے دعووں کو تباہ کرتی ہے کہ کچھ نہیں چھپایا، آپ فنانشل ٹائمز کیخلاف دعوی کیوں دائر نہیں کرتے، آپ کو تو اُس ملک کی عدالتوں پر بڑا اعتبار ہے۔

بانی رکن کا مزید کہنا تھا کہ لارجر بنچ تشکیل دینے کا فیصلہ خوش آئند ہے اور اس کا خیر مقدم کرتے ہیں، یہ کیس پاکستان کی سیاست کو تبدیل کر دے گا، شوکاز کے نتیجے میں آنے والے دنوں میں جو فیصلے آئیں گے قوم کی آنکھیں کھل جائیں گی۔

اکبر ایس بابر نے کہا کہ پی ٹی آئی ہمارا گھر ہے ہم نے پہلے اپنے گھر سے شروع کیا ہے، دیگر جماعتوں کی تحقیقات جاری ہیں، الیکشن کمیشن کو کسی قسم کی معاونت اس پر چائیے ہم حاضر ہیں۔