کراچی اور گرد و نواح میں بارش، امتحانات ملتوی

کراچی اور گرد و نواح میں مون سون بارشوں کے چوتھے اسپیل کے تحت بارشوں کا سلسلہ وقفے وقفے سے جاری ہے۔

کراچی میں بدھ کی دوپہر بارش کا سلسلہ شروع ہوا جس کے باعث گزشتہ 4 روز سے جاری شدید گرمی کا زور کسی حد تک ٹوٹ گیا۔

دوسری جانب بعض علاقوں میں بجلی کی فراہمی بھی معطل ہوگئی۔

محکمہ موسمیات کے مطابق مون سون ہوائیں مشرق سے مسلسل سندھ میں داخل ہورہی ہیں اور جمعرات تک یہ مزید شدت اختیار کرلیں گی۔

کہاں کتنی بارش ہوئی

کراچی میں سب سے زیادہ پی اے ایف فیصل بیس پر 51 ملی میٹر بارش ریکارڈ کی گئی۔

اس کے علاوہ قائدآباد 45، جناح ٹرمینل میں35.6، کراچی اولڈ ایئر پورٹ 35، کورنگی 34.8 اور گڈاپ ٹاؤن میں 34.8، سعدی ٹاون31.8، صدر33،میٹ آفس میں27 ملی میٹر، ناظم آباد24.4 اور نارتھ کراچی میں 22ملی میٹر بارش ریکارڈ کی گئی۔

پی اے ایف بیس مسرور11 ملی میٹر، موسمیات 19 ملی میٹر، ناظم آباد 22 ملی میٹر بارش ریکارڈ کی گئی۔

کےالیکٹرک کا موقف

کراچی میں بارش کے باعث کےالیکٹرک کے300 فیڈرز ٹرپ ہوگئے۔ ضلع وسطی، شرقی، ملیر اور غربی کے متعدد علاقوں میں بجلی غائب ہوگئی۔ترجمان کےالیکٹرک نے بتایا کہ کےای کا سسٹم مستحکم ہے اور فیڈرزحفاظت کے پیشِ نظر بند ہیں، کچھ علاقوں میں پانی، کنڈوں کے پیش نظر حفاظتی اقدام لینا ناگزیر ہے۔

امتحانات ملتوی

کراچی میں مون سون بارشوں کے باعث انٹر اور ایم بی بی ایس کے سالانہ امتحانات ملتوی کردیئے گئے ہیں۔

اعلیٰ ثانوی تعلیمی بورڈ کے جاری کردہ اعلامیے کے مطابق 11 اگست کو سوکس ( شہریت)، سوشیالوجی (عمرانیات)، اسٹیٹکس (شماریات) پرچہ دوم اور نرسنگ پرچہ دوم جب کہ خصوصی امیدواروں کا فائن آرٹس (فنون لطیفہ) پرچہ اول کا امتحان ہونا تھا۔

11 اگست کو ہونے والے امتحانات کو ملتوی کردیا گیا ہے ، اب ان مضامین کے امتحانات 22 ااگست بروز پیر کو دیئے گئے شیڈول اور وقت کے مطابق ہوں گے۔

دوسری جانب ڈاؤ یونیورسٹی آف ہیلتھ سائنسز میں 11گست کو ہونے والے تمام امتحانات ملتوی کردیئے گئے ہیں۔

کنٹرولر امتحانات ڈاکٹر راشد قدیر کا کہنا ہے کہ امتحانات کا انعقاد کرکٹ گراؤنڈ اوجھا کیمپس اور ڈاؤ میڈیکل کالج میں ہونا تھا تاہم اب ملتوی شدہ امتحانات کی نئی تاریخ کا اعلان بعد میں کیا جائے گا۔

محکمہ موسمیات کی پیش گوئی

محکمہ موسمیات کے مطابق مون سون ہواؤں کے باعث 14 اگست تک کراچی کے علاوہ سندھ کے جنوبی اضلاع اور بلوچستان کے ساحلی اور میدانی علاقوں میں وقفے وقفے سے گرج چمک کے ساتھ کہیں ہلکی اور کہیں تیز بارشیں ہوسکتی ہیں۔

بارشوں کے باعث کراچی، حیدرآباد، بدین، ٹھٹہ، سجاول، جام شورو اور قمبر شہدادپور میں سیلابی صورت حال پیدا ہوسکتی ہے۔

شدید بارشوں کے باعث کیچمنٹ ایریاز میں پانی آنے سے حب اور تھڈو ڈیم پر دباؤ بڑھ سکتا ہے۔ اس کے علاوہ 14 اگست تک سمندر میں شدید طغیانی کے باعث اونچی لہریں پیدا ہوسکتی ہیں جس کے پیش نظر ماہی گیر کھلے سمدر میں جانے سے گریز کریں۔