رہنما تحریک انصاف شہباز گل گرفتار، بغاوت کا مقدمہ درج
عمران خان کے چیف آف اسٹاف شہبازگل کو پاک فوج میں بغاوت پر اُکسانے کے الزام میں اسلام آباد پولیس نے گرفتار کرلیا۔
شہباز گل کو بنی گالا جاتے ہوئے عمران خان چوک سے گرفتار کیا گیا ۔ گاڑی میں موجود ان کے ساتھی نے گرفتار کرنے والوں پر تشدد سمیت کئی الزامات عائد کر دیئے۔
پی ٹی آئی رہنما مراد سعید نے ٹوئٹر پر اطلاع دیتے ہوئے بتایا ہے کہ پاکستان تحریک انصاف کے رہنما اور چیف اسٹاف آفیسر شہباز گل کو گرفتار کرلیا گیا ہے۔
اپنی ٹوئٹ میں مراد سعید ( Murad Saeed ) کا مزید کہنا تھا کہ “کس کس کو گرفتار کروگے؟ کتنے صحافیوں پر پابندی لگاؤ گے؟ شہباز گل کی گاڑی کے شیشے بھی توڑ دئے۔
مراد سعید نے یہ بھی کیا کہ کل رات ایک خوفناک پلان تھا لیکن عمران خان کے جانثاروں نے واضح پیغام دیا عمران خان ریڈ لائن ہے“۔
مراد سعید کے مطابق بغیر نمبر پلیٹ کی گاڑیوں میں سوار افراد آئے اور انہیں گرفتار کرکے لے گئے۔ شہباز گل کو تشدد کا نشانہ بھی بنایا گیا۔ پی ٹی آئی رہنماؤں کے مطابق سادہ کپڑوں میں ملبوس افراد شہباز گل کو اپنے ساتھ لے گئے۔
انہوں نے یہ بھی بتایا کہ شہباز گل بنی گالہ کے قریب پارٹی دفتر میں موجود تھے۔
دوسری جانب پی ٹی آئی رہنما فواد چوہدری کی جانب سے ٹوئٹ میں بتایا گیا ہے کہ شہباز گل کو اسلام آباد سے گرفتار کرلیا گیا ہے۔
اسلام آباد پولیس کے مطابق پی ٹی آئی رہنما کو گرفتار کرکے تھانہ بنی گالہ منتقل کیا گیا ہے۔ شہباز گل پر بغاوت پر اکسانے کے الزام کے تحت مقدمہ درج ہوا ہے۔
اہم اجلاس طلب
شہباز گل کی گرفتاری کے بعد چیئرمین پاکستان تحریک انصاف ( پی ٹی آئی ) اور سابق وزیراعظم عمران خان نے بنی گالہ میں ہنگامی اجلاس طلب کرلیا ہے۔
اجلاس میں شہباز گل کو حراست میں لئے جانے کے بعد کی صورتحال پر غور ہوگا۔ شہباز گل کے معاملے پر آج ہی عدالت سے رجوع کرنے پر غور کی جائے گا۔
